Aqtóbe oblysyna qarasty Shalqar aýdany, Jańaqonys aýyldyq okrýginiń ákimi Ersaıyn Danabek óz ornyn erkinen tys bosatyp otyr.

            Sebep taǵy sol – qoǵamdy jegi qurttaı jep jatqan jemqorlyq. Alaıda mańdaıdyń sory bolǵan mıllıondar jelinbedi bul joly. Bar bolǵany 1350 teńge. Bul týraly «Qamshy» portaly «Moı Gorod» portalyna silteme jasaı otyryp habarlaıdy.

            Daýdyń basy balabaqshadaǵy ýnıtazdan shyǵyp otyr. Bıyl jazda bolǵan jóndeý jumystary barysynda basshy merdigerge 29 myń teńge artyq tólegeni anyqtalǵan. Alaıda basshy bul qarajatqa eki ýnıtaz jáne tórt rakovına alǵyzǵanyn, keıin qubyrdyń joq bolýyna baılanysty onyń qurylmaǵanyn málimdegen.

            Qaıta tekserý barysynda 1350 teńgeniń jetispeıtindigi belgili bolǵan. Sóıtip, Ersaıyn Danabektiń isin Shalqar aýdandyq ákimdigindegi tártiptik keńeste qaraýǵa sheshim qabyldanady. Qysqasy soǵan bola aýyl  ákimi óz orynynan aıyrylyp qalǵan. Qazir ol óz quqyǵyn qorǵaý úshin tártiptik  keńespen sottasyp álek.

            «Bul ýaqytta aýdan ákimi demalysta bolatyn. Jumys ornyn bosatsyn dep úkim shyǵara salǵany bolmasa, onyń orynbasary nazaryn buryp ta qaramady. Men munymen kelispeımin. Óıtkeni, eshqandaı jemqorlyq faktisi oryn almaǵan. Onyń ústine, prokýrorlar da óz qujattarynda kóptegen málimetterdi jalǵan jazdy. Qazir olarmen sottasyp jatyrmyn. Ózimdi zańsyz jumystan shyǵaryp jibergenin dáleldeımin», - deıdi eks-sheneýnik.

            Ersaıyn myrza búginge deıin eki sottan utylyp tynǵan. Endi ol joǵarǵy sotqa deıin baramyn dep otyr.