Sarapshylardyń biri «Bektenovtyń potensıaly myqty, endi óńir ákimderi tyrp ete almaıdy» dese, endi biri odan úlken ózgerister kútýdiń qajeti joq ekenin aıtady.

Dos Kóshim Oljas Bektenovtyń úsh artyqshylyǵyn atap kórsetti. Biraq saıasattanýshy odan úlken ózgeristerdi kútýdiń qajeti joq dep oılaıdy.

«Birinshiden, ol «eski Qazaqstannyń» ishinde asa kózge kórinbegen, jaǵymsyz keıipker bolmaǵan, anaý-mynaý máselelerge basy shatylmaǵan tyń adam. Ekinshiden, sybaılas jemqorlyqpen kúreste basshylyq qyzmet atqarǵan. Sondyqtan mundaı jańalyq jemqorlyq máselesi óte ózekti Qazaqstanda pozıtıvti qabyldanady. Úshinshiden, ol – Toqaevtyń senetin, úmit artatyn, óz komandasyndaǵy adamy. Prezıdent osylaı óz adamdaryn jaýapty oryndarǵa jaılap qoıa bastaıdy. Negizi, Premer-mınıstr Toqaevqa eń jaqyn adam bolýy kerek. Biraq jańa Premer-mınıstrden úlken ózgeristerdi kútýdiń qajeti joq dep oılaımyn. Bul Qazaqstan tarıhynda tek Qajygeldınniń qolynan ǵana kelgen».

Sondaı-aq saıasattanýshy «Eski Qazaqstan» jáne «Jańa Qazaqstan» degen termınderdi ózi basy qabyldamaıtynyn naqtylaıdy.

«Keńes zamanynda biz uranmenen kún kórgenbiz. Sol sekildi bul ekeýi de men úshin jasandy uran. Áıtpese keshe «Eski Qazaqstanda» júrgender búgingi «Jańa Qazaqstan» bıliginde áli sol kúıinde júr. Prezıdent te, Senat tóraǵasy da, memlekettik hatshy da «Eski Qazaqstan» quramynda bolǵan. Sondyqtan bul termınderdi men moıyndamaımyn. Al bılik bireý. Ol eshqashan bólinbeıdi. Bul Toqaevty aqtap alý úshin qoldanylyp jatqan ıdeologıalyq tásil dep oılaımyn».

Eýrazıalyq ıntegrasıa ınstıtýtynyń dırektory, saıasattanýshy Orazǵalı Selteev Oljas Bektenovtyń óńir ákimderin tyrp etkizbeı, óz qadaǵalaýyna alýyna potensıaly jetkilikti ekenin aıtty.

"Ákimder taqymyn qysa berse bolady, endi kóz jumyp, ortalyqqa múlgip qarap otyrý degen bolmaıdy. Eger Smaıylovtyń Úkimeti qańtar oqıǵalary men saıası ózgeristerden keıin laýazymdy oryndardy «eski Qazaqstan» adamdarynan «tazartyp», tranzıttik fýnksıany atqarsa, al Bektenovtyń Úkimeti reformatorlyq fýnksıany qolǵa ala otyryp, jańa erejeler boıynsha ekonomıkalyq prosesterdi bir jolǵa qoıýda batyl ári tabandy áreket etýi kerek bolady. Eger ol bul baǵytta Natalá Godýnovamen (Joǵary aýdıtorlyq palata tóraıymy – avt.) tyǵyz jumys istesse, jańa Úkimettiń tıimdiligin arttyrýǵa bolady dep oılaımyn", dep jazdy Selteev óziniń Telegram arnasynda.