Kúni keshe májiliste turmystyq zorlyq-zombylyq máselelerine arnalǵan zań jobasy tanystyryldy. Jańa zań boıynsha, buryn 15 táýlikke qamalatyn «boksshylar» bul joly 50 táýlikke jabylady eken.

«Biz judyryq ala júgiretinderge kem degende 6 aı jaza berýdi kútkenbiz. Arasyndaǵy 35 kún men aıyppuldyń kóptigi «áıeldiń tilinen» dep turǵan tırandar úshin túk emes», dep ashynýda áleýmettik jelide áıelder qaýymy.

Depýtat Anas Baqqojaev aıdy aspanǵa shyǵardy. Onyń aıtqany: «Erlerdi de túsinýimiz kerek. Basynda janjal týyndaıdy. Sol janjal neden týyndaıdy? Árıne, áıeldiń tiliniń uzyndyǵynan. Qazaqta «Jaqsy áıel – yrys, jaman áıel – urys» deıdi, bolmasa “Erge jaqqan áıel elge de jaǵady” deıdi. Biz qazaqy tárbıeden alshaqtap bara jatyrmyz».

Anas myrzanyń áıelderdi ashyqtan-ashyq aıyptaýy qoǵamda keleńsizdik týdyrdy.

«Bılikte Baqqojaev sekildi qazaq áıelderiniń baǵyn keri tebetin depýtattar turǵanda qazaq qoǵamynda «Saltanattardyń» kóbeıe beretini haq. Bul kisi osy taqyrypta dısertasıa qorǵasa, ǵylymı ataq alar edi», dep jeli qoldanýshylary narazylyǵyn jasyrmady.

BUU statısıkasyna súıensek, elimizde bir jylda 400 áıel kúıeýiniń qolynan qaza tabýyp, 327 áıel múgedek bolyp qalǵan.

Bul – ulttyq tragedıa. Keshe elin jaýdan qorǵaǵan erlerimizdiń basyna mundaı kún týýyna hám usaqshyl bolýyna ne sebep? Áıeline tóbe quıqań shymyrlaıtyndaı qatygezdikterdi jasaǵanyn estigende esiń shyǵady. Máselen, bir jyl buryn Túrkistan oblysy Ordabasy aýdanynda 43 jastaǵy erkek 37 jastaǵy áıelin 4 balanyń kózinshe uryp óltiredi. Áıeldiń barlyq tisi qaǵylǵan, ishki organdary túgel ezilgen, basynda bir tal shashy qalmaǵan. Ol azdaı, er adam qylmysyn jasyrý maqsatynda áıeliniń aýzyna konák quıǵan. 4 bala qanǵa bókken anasyn qushaqtap otyryp, polısıa shaqyrǵan.

Bul jerde de áıeli kináli bolýy múmkin degen oı sanańyzǵa sap ete qalsa, toqtańyz! Kórshileriniń aıtýynsha, áıel 4 balasynyń baqytyn bárinen bıik qoıǵan, tańnan qara keshke deıin Maǵjan Jumabaevsha aıtsaq, qazan-oshaqtan ózgeni bilmegen, aýzynda sózi, ústinde bózi joq adam bolǵan.

Qysqasyn aıtsaq, qoǵamda rýhanı jutań, tulǵa bolyp qalyptaspaǵan azamattar kóp-aq. Dese de álimjettik kórsetetin kúıeýsymaqtan ajyrasa jónelgennen góri zań qatańdasa, erler qaýymy ózderin tárbıeler me eken degen úmit joq emes...

Sondyqtan Parlamenttegilerge jańa zań jobasyna taǵy da ózgerister men tolyqtyrýlar qajet ekenin eske salamyz.