5 aqpan Prezıdent Qasym-Jomart Toqaev Úkimetti otstavkaǵa jiberdi. Mınıstrler kabınetinde bálkim keıbiri óz ornynda qalar, biraq eki jyldan astam ýaqyt Premer-mınıstr bolǵan Álıhan Smaıylov qoshtasý postyn jazyp, qaıtyp kelmeıtinin bildirdi. Ol postynda:

«Toqaevqa syndarly ýaqytta Qazaqstan Respýblıkasynyń Úkimetin basqarýǵa senim bildirgeni úshin zor alǵysymdy bildiremin. Ótken eki jyl qoǵam úshin sheshýshi kezeń boldy. Ótken jyldyń qorytyndysy boıynsha ekonomıkanyń ósýi 5,1%-ti qurady. Barlyq negizgi sektorlar oń damý dınamıkasyn kórsetti. Inflásıa eki esege tómendetildi»,  – deıdi.

Degenmen, kópshiliktiń postqa jazǵan pikirinen Smaıylovqa kóńili tolmaǵanyn baıqaýǵa bolady. Máselen, 

«Bári jaqsy bolsa, nege Ulttyq qordan aqsha aldyń? Nege zeınetaqy qorynyń aqshasyn JES salýǵa jumsaıyn dep jatyrsyńdar?», «Úmit aqtalmady, jemqorlyq adam shoshytarlyq deńgeıge jetti. Qorǵanys, densaýlyq, áleýmettik, «Qazavtojol», bilim salasy mınıstrleri jumysy óte nashar. Oblys, aýdan basshylary tek tamyr-tanys, týǵan-týystaryn jumysqa taǵaıyndaýda. Halyqtyń senimine ıe bolatyn Úkimet basshysy mınıstrler saılansa degen úmitimiz qashan aqtalar eken?», «Siz Úkimetti basqarǵan kezeńde búrokratıa shyńyna jetip, korrýpsıa qatty damyǵan shaqqa tuspa-tus keldi. Bul olqylyqtardy toqtatýǵa Úkimettiń áli jetpedi», «Birinshi ret áleýmettik jeliden kórýim. Jan-jaǵyna jaltaqtamaıtyn, týrashyl adam kerek qoı, bolmasa Qajygeldındi shaqyrtsyn», «Óz basym sizge jaqsy baǵa bere almaımyn, aıtarlyqtaı jetistikter joq, halyqtan alshaq boldyńyz. Biraq Mamınge qaraǵanda Qazaqstanda Premer-mınıstr bar ekeni kórinip turdy. Aldaǵy ýaqytta shyn qabiletińiz jetetin, súıip  jumys isteńiz dep ótinemin», «Bul Úkimet saıası-ekonomıkalyq daǵdarysqa alyp keldi. Tipten bul ókimet kelmeý kerek edi» degen saryndaǵy pikirler óte kóp.

Eske sala ketsek, 51 jastaǵy Smaıylov Qazaqstannyń Premeri laýazymyn 2 jyl bir aı atqardy.