Qazaqstan ekonomıkanyń quldyraýyna áser etetin syrtqy faktorlarǵa qaramastan, júrgizip otyrǵan ınstıtýttyq reformalar men qýatty makroekonomıka­lyq saıasattyń arqasynda jahandyq básekege qabilettilik reıtıńinde 42-shi orynǵa qol jetkizdi. Keshe Prezıdent janyndaǵy Ortalyq komýnıkasıalar qyzmetinde ótken baspasóz konferensıasynda «Nazarbaev Ýnıversıtettiń» prezıdenti Shıgeo Katsý osylaı dep málimdedi.
«Jahandyq básekege qa­bi­lettilik reıtıńinde Qazaq­stan­nyń 42-shi orynǵa kóteri­lýimen quttyqtaımyn. Bul úlken jetistik. 2008 jylǵy daǵ­darystan keıin qıyn kezeń boldy. Al qazirgi tańda saıası bastamalardyń arqasynda biraz kórsetkishter boıynsha ilgerileýshilikke qol jetkizildi. Qazaq­stannyń damýy men báse­kege qabilettiligin arttyrýda eldiń makroekonomıkalyq saıa­satynyń árdaıym qýatty bolýy negizgi ról atqardy», dedi «Na­zarbaev Ýnıversıtettiń» pre­zıdenti.
Sonymen qatar, Shıgeo Kat­sý Qazaqstandy jahandyq básekege qabilettilik reıtıńinde odan ári ilgeriletýde Elbasynyń usynǵan bes ınstıtýttyq reformasy men ony júzege asyrý boıynsha qabyldanǵan Ult jos­paryndaǵy «100 naqty qadam­nyń» mańyzdylyǵyn atap ótti.
«Qazirgi tańda ekonomıkanyń damýyna keri áserin tıgizetin syrtqy faktorlar jeterlik. Óńirdegi turaqsyzdyq, Taıaý Shy­ǵystaǵy qaqtyǵystar men álemdi jaılap bara jatqan daǵdarys kezinde usynylǵan bul reformalar el aldynda turǵan ótkir ári mańyzdy máselelerdi sheshýge baǵyttalǵan. Osy bastamalarǵa úlken mán berip, ony júzege asyrýǵa barlyǵymyz atsalysýy­myz qajet», dedi ol.
Esterińizge sala ketsek, Dú­nıejúzilik ekonomıkalyq forým 2015-2016 jyldarǵa arnalǵan jahandyq básekege qabilettilik jónindegi esebin jarıalaǵan bolatyn. Oǵan sáıkes, Qazaqstan álemniń 140 eli arasynda 42-oryndy ıelenip, ótken jylmen salystyrǵanda segiz satyǵa joǵarylady.
Atalǵan reıtıń boıyn­sha, bıyl elimiz Italıa men Polshanyń ortasyna jaı­ǵasty. Sóıtip, Reseı, Latvıa, Fıl­ıppın jáne Túrkıa syndy el­derdi artta qaldyrdy. Al birinshi orynǵa osymen jeti jyl qatarynan Shveısarıa ıe bolyp otyr. Ekinshi oryndy Sıngapýr saqtap qaldy. AQSH úshinshi oryn­ǵa ornyqsa, Germanıa besin­shi satydan tórtinshige kóte­rildi. Al Nıderland besinshi oryndy ıelendi.
Aıta keteıik, bul reıtıńte 2013 jáne 2014 jyldardyń nátıjeleri boıynsha Qazaqstan eki jyl qatarynan 50-orynǵa turaqtaǵan bolatyn. Jahandyq básekege qabilettilik reıtıńi ınfraqurylym, makroekonomıka, densaýlyq saqtaý, ınovasıa syndy salalardy qamtyǵan 110-nan asa kórsetkish negizinde jasalady.

"Qamshy "silteıdi

Derekkóz: "Egemen Qazaqstan"