Qazaqstan Prezıdenti janyndaǵy Ortalyq komýnıkasıalar qyzmetinde ótken brıfıńtegi áńgime elimizdegi balalar quqyǵy máselesine arnaldy.
Ótken qyrkúıekte Je­neva qalasynda BUU-nyń Bala quqyqtaryn qorǵaý jónindegi komıtetiniń kezekti basqosýy ótip, onda elimizdegi osy máse­le­ge qatysty baıandama tyń­dalǵan.
Brıfıńte osy baıandamanyń negizgi taqyrybynyń biri jet­kin­shekterge bilim berý isine arnalǵanyn aıtyp ótken Bilim jáne ǵylym vıse-mınıstri Esen­ǵazy Imanǵalıev: «Qazaq­stannyń saıasatyna sáıkes, elimizde barlyq bala tegin bilim­men qamtamasyz etilýi tıis. Qazirgi tańda elimizde bala­lar­dyń 99,8 paıyzy tegin bilimmen qamtylǵan. Budan bólek, ha­lyqtyń az qamtylǵan jigi men ál­siz tobyndaǵy – az qamtylǵan otbasylardaǵy balalar, múm­kin­digi shekteýli balalar quqy­ǵynyń qorǵalýyna úlken kóńil bólinýde. Elbasynyń tap­syrmasymen 2020 jylǵa qaraı ondaı balalardyń 70 paıy­zynyń barlyq oqý oryndaryna qoljetimdiligi bolýy tıis», – dep ári qaraı spıker BUU sarapshylarynyń balalar quqyqtaryn qorǵaý júıesin qu­rýdaǵy bizdiń elimizdiń jetistikterin joǵary baǵalap otyrǵanyna toqtaldy.
Bilim jáne ǵylym mı­nıstr­liginiń Balalar quqyǵyn qor­ǵaý komıteti tóraǵasynyń oryn­­basary Aıash Mákenova óz só­­zinde komıtet janynan qo­ǵamdyq uıymdardyń qaty­­sýymen respýblıkalyq keńes­ter qurylǵanyn, olardyń jumysyna azamattyq sektor men qalyń jurtshylyqty tartýǵa múmkindik týǵanyn, jalpy, balalar quqyǵyn qorǵaý máselesinen eshkimniń de tys qalýy orynsyz ekenin aıtty. Sondaı-aq, ol 2013 jyly óńirlik departamentter biriktirilgenin, degenmen, árbir aımaqta bilim berý basqarmasy janynan qurylǵan arnaıy bólimsheler balalardyń quqyǵyn qorǵaý boı­ynsha jumys isteıtinin jet­kizdi. Óz eliniń bolashaǵy sana­latyn balalar quqyǵyna qatys­ty máselede usaq-túıek­tiń bolmaıtynyn kesip aıt­qan Aıash Múrsálimqyzy BUU komıtetiniń usynysynda bala­lar­dyń quqyǵyn qorǵaý bo­ıynsha qoǵamdy keńinen aqpa­rattandyrý qajettigi atap kórsetilgen, al onyń biz­diń elimizdiń múddesimen sáı­kes­tigin eske salamyn, sondyqtan, sizder, jýrnalıser, arnaıy senim telefony barlyǵyn oqyrmandarǵa jetkizýlerińizdi suraımyn dep, 74-25-28 nómirine habarlasýǵa bolatynyn jarıa etti. A.Mákenova bala quqyǵyna qatysty materıaldardyń komıtet saıtynda arnaıy qazaq, orys, aǵylshyn tilderinde jarıalanǵanyn da aıtyp ótti.
Munan soń brıfıńke qa­tysýshylar jýrnalıser tarapynan qoıylǵan saýaldarǵa jaýap berdi. Onda balalar úıindegi búldirshinderdi asyrap alý, balalardyń shetel asýy jáne áleýmettik jelilerde balalaryna qatysty kómek suraǵan janaıqaı jaıynda áńgime boldy. Suraq-jaýap barysynda málim bolǵandaı, qazirgi ýaqytta elimiz boıynsha Úkimettiń qaraýyna berilip kelgen balalardyń sany azaıyp otyr jáne bala asyraý­da, eń aldymen, basymdyq óz aza­mattarymyzǵa berilip, al she­teldikter óz ishimizden asyrap alýshy tabylmaǵan kúnde ǵana bala ala alatyny jet­kizildi. Sheteldegi bala­lar­dyń densaýlyǵy, áleýmettik jaǵdaıy Úkimet qadaǵalaýyna alynyp, oǵan monıtorıń udaıy júrgizilip otyrýy aıty­lyp, áleýmettik jelilerde aý­rý balalalaryna kómek su­raý­­shylarǵa da monıtorıń júr­gizilip, qajetti kómek kórsetiletini sóz boldy.

Derekkóz: Egemen Qazaqstan