Kógildir otyn – el ómirine bereke, tabys, shýaq ákeledi. El­diń áleýmettik, ekonomıkalyq jaǵdaıyna úlken serpin beredi. Uly Dalanyń qýaty, sondaı-aq, memlekettik aýqymdaǵy birqatar mindetterdi sheshýge múmkindik týǵyzady. «QazTransGaz» AQ Taraz qalasynyń gaz taratýshy jelilerin jańǵyrtý jónindegi aýqymdy jobany iske asyrýdy 2011 jyly bastaǵan bolatyn. Negizgi maqsat – tutynýshylardy gazben jabdyqtaý senimdiligin arttyrý úshin gaz jelileri men jabdyqtardy jańartý. Bul ju­mystardy aıaqtaý 2019 jylǵa josparlanǵan.
Jalpy alǵanda, Taraz qalasyn gazben jabdyqtaý jumysy jarty ǵasyr buryn júzege asa bastaǵan eken. Elý jylda árıne, temir de tozady. Osy jobany qolǵa alǵan kezde taratýshy gaz jelileri men jabdyqtardyń 66 paıyzynyń tozyǵy jetkeni málim boldy. Jedel sharalar qabyldanbaǵanda apattyq jaǵdaılar kóbeıip, gaz jetkizýde úlken qıyndyqtar týyndaıtyny anyq edi. Jań­ǵyrtý baǵdarlamasynyń arqa­synda eskirgen qubyrlar men jabdyqtardy aýystyrýmen qatar, Taraz qalasynyń búkil gaz taratý júıesi ózgerdi. «QazTransGaz» AQ tómen qysymdy jerústi gaz qubyrlaryn orta qysymdy jer­asty gaz qubyrlarymen almastyrýda.
Jalpy alǵanda, jobany iske asyrý barysynda jeke sektorǵa gaz jetkizetin 940 shaqyrym gaz qubyry aýystyrylatyn bolady. Jańa tóselgen orta qysymdy qubyrlar SHTP (shkaftyq taratýshy pýnktter) jelisine jalǵanyp, tutynýshylar tolyǵymen gaz alyp otyr. Budan basqa, eskirgen barlyq bolat qubyrlar prolıetılen qubyrlarmen almastyrylǵan, olardyń paıdalanylý merzimi 50 jyldan astam merzimdi quraıdy. Eki satyly gazben jabdyqtaý júıesine kóshý jónindegi ınno­vasıalyq sheshim gaz qysymynyń jetkiliksizdigi problemasyn sheshýge, júıeniń ótkizý qabiletin 1,5 esege arttyrýǵa múmkindik berdi. Sondaı-aq, gaz qubyrlaryna zańsyz qosylý faktilerin boldyrmaıdy. Gaz berýdiń osy zamanaýı júıesi tutynýshylar úshin turaqty jáne irkilissiz gaz alýǵa jol ashyp otyr.
– Shkaftyq pýnktter turǵyndar úshin de, tekserýshiler úshin de óte yńǵaıly, – deıdi bul jóninde «QazTransGaz Aımaq» AQ Jambyl óndiristik fılıalynyń dırektory Bolat Murtazaev. – Jasyratyny joq, buryn qalanyń shet jaǵynda nemese úlken qubyrdan alys or­nalasqan úılerdiń turǵyndary gaz qysymynyń tómendigin aıtyp shaǵymdanatyn. Shkaftyq pýnkt­ter ornatýdyń arqasynda bul problemadan qutylyp kelemiz. Jáne bul gaz tekserýshilerdiń de jumysyn jeńildetti. Tekse­rý­shiler burynǵydaı ár úı­diń qaqpasyn qaǵyp, esigin uryp júrmeıdi. Kóshe boıy­na or­natylǵan shaǵyn shkafta elek­trondy eseptegish bar. Sony kiltpen ashyp, ár úıdiń paı­dalanǵan gazynyń kólemin bile alady. Taǵy bir aıtary, eger qa­ryzy kóbeıip ketse, avtomatty túrde ár úıdiń gaz qubyryn jaý­yp qoıa alady. Jalpy, osy ın­vestısıalyq joba júzege asa bas­taǵaly beri 633 shaqyrym jerasty gaz qubyrlary tóselip, barlyǵy 14 106 jeke shkaftyq pýnktter ornatyldy. Bıylǵy jyldyń ózinde Taraz qalasynda 7 700 SHTP qoıyldy. Elimizdiń eki iri sha­hary – Shymkent pen Tarazda búkil TMD keńistiginde tuńǵysh ret gaz taratý jelilerin aýqymdy jańǵyrtý jumystary júrgizilip otyr. «QazTransGaz» AQ iske asyryp otyrǵan osy orasan zor joba «Uzaq merzimdi ınvestısıalyq tarıf» formýlasynyń tıimdiligin tolyǵymen dáleldeıdi. Jańǵyr­týdy júrgizýge baılanysty bar­lyq jumystar «QazTransGaz» AQ-tyń menshikti jáne qaryz qara­jaty esebinen júrgiziledi.
Jalpy alǵanda, Jambyl oblysy boıynsha gaz qubyr­la­rynyń jalpy uzyndyǵy 3 891 shaqyrymnan asady. Onyń ishin­de Taraz qalasynda 1 368 sha­qyrym. Óńirdegi 10 aýdannyń 8-i gazdandyryldy. Oblystaǵy gaz­dandyrylǵan páterlerdiń sany – 162 851, tabıǵı gaz alatyn gaz­dandyrylǵan ónerkásiptik ká­siporyndar – 167, komýnaldyq-turmystyq kásiporyndar sany 4077-ni quraıdy.
«QazTransGaz» AQ – Qazaq­stannyń gaz jáne gazben jabdyqtaý salasyndaǵy ulttyq operatory. «QazTransGaz» AQ kompanıalar tobynyń quramyna gaz jáne ony qaıta óńdeý ónimderin óndiretin, tasymaldaıtyn jáne ótkizetin kásiporyndar men uıymdar kiredi.

Derkkóz: Egemen Qazaqstan