Keshe qastandyq jasalǵan Kıevte turatyn qazaqstandyq belsendi, "Báse" YouTube-arnasynyń avtory Aıdos Sadyqovtyń jaǵdaıy aýyr. Bul týraly Azattyq radıosy habarlady.

Sadyqovqa keshe, 18 maýsymda Kıevtegi aýrýhananyń birindegi neırohırýrgıa bóliminde jasalǵan operasıa eki jarym saǵatqa sozylǵan. Bul týraly Aıdos Sadyqovtyń áıeli, jýrnalıs Natalá Sadyqova Azattyqqa bergen suhbatynda aıtqan.

– Oq samaıyna tıip, mıyn janap ótken. Keshe jansaqtaý bólimine kirip shyqtym, jaǵdaıy óte aýyr. Dárigerler jaman boljam jasap otyr. Búgingi túnnen aman qalsa, taǵy baqylaımyz dedi. Aıdos men jansaqtaý bólimine kirgende estimedi, biraq men odan ólmeýin suradym. Meni estigen sıaqty, sebebi búgin [19 maýsymda] tańerteń Kıev ýaqytymen 7-de aýrýhanaǵa habarlasqanymda "búgingi túnnen aman shyqty" dep aıtty, – dedi Sadyqova.

2014 jyly Qazaqstan parlamentiniń eks-depýtaty Marat Iteǵulovtyń shaǵymy boıynsha Natalá Sadyqovanyń ústinen qylmystyq is qozǵalǵan soń erli-zaıypty Aıdos jáne Natalá Sadyqovtar Aqtóbeden Kıevke ketken. Iteǵulov jýrnalıs Sadyqovanyń laqap atpen opozısıalyq gazetke jazǵan maqalasyn "jala jabý" dep, sotqa aryzdanǵan.

Byltyr Qazaqstan úkimeti Aıdos jáne Natalá Sadyqovtardy "arazdyq qozdyrdy" dep aıyptap, izdeý jarıalaǵan.