Ázirbaıjanda nárestege túrki áleminiń uly tulǵasy Atatúriktiń esimin berýge tyıym salyndy. Bul týraly APA agenttigine úkimet janyndaǵy termınologıa jónindegi komısıa tóraǵasynyń orynbasary Saıaly Sadyǵova málim etti.
Onyń aıtýynsha, bul tyıym beıresmı sıpatqa ıe. Soǵan qaramastan, el bıligi sábıine tanymal saıasatkerdiń esimin beremin dep kelgenderge kelisim bermeı otyr. Ázirbaıjan bıliginiń bul sheshimdi qabyldaýyna Túrkıa úkimetiniń ótinishi sebep bolǵan eken. Alaıda, túrik aǵaıyndardyń mundaı ótinishti qashan aıtyp júrgeni belgisiz.
Ótken jyldyń mamyr aıynda Sadyǵova jergilikti turǵyndarǵa Túrkıanyń tuńǵysh prezıdentiniń esimi berýge tosqaýyl qoıylatyny týraly aıtyp edi.
«Atatúrik - tarıhı tulǵa, sondyqtan ol tek Túrik eline tıesili bolýy kerek», - degen. S.Sadyǵova qazirgi kúni Ázirbaıjanda kóshbasshynyń esimin ıelengen 18 adam turatynyn aıtty.
Jalpy, atalmysh komısıa buǵan deıin adam atyna qatysty birqatar málimdeme jasaǵan-dy. Máselen, 2011 jyly komısıa músheleri eldegi árbir onynshy esim standarttarǵa saı emestigin aıtsa, 2013 jyly jańa týǵan balaǵa qoıylyp jatqan esimderdiń kóbi sheteldik bolyp otyrǵanyn alǵa tartyp másele kótergen bolatyn, dep jazady Lenta.ru.
