Qazaqstandyq rejıser Serik Apyrymovtyń týyndysy «Baýyr» fılmi AQSH-tyń Kalıfornıa shtatynda ótken 2-shy Halyqaralyq kınofestıvalde «Shyǵys Eýropa elderiniń eń úzdik fılmi» atandy, dep habarlaıdy "QazAqparat".

Rejıser Serik Apyrymov soltústikamerıkandyqtarǵa tól shyǵarmasyn ózi usynyp, Fess Parker - A Doubletree by Hilton Resort bolǵan saltanatty marapattaý rásimine qatysty.

30  qańtar men 9 aqpan aralyǵynda ótken bul festıválde qazaq rejıseriniń kartınasymen júlde úshin  Mıroslav Mandıchtiń (Slovenıa, Horvatıa)«Adrıa blúz»; Vıktor Taýstyń (Slovakıa, Lúksembýrg, Chehıa, Fınlándıa) «Saıqymazaqtar»; Ignas Ionınastyń (Lıtva, Latvıa) «Oıynshy»; Týdor Krıstıan Jýrgıýdiń (Rýmynıa) «Iajapon ıti»; Iasek Bromskııdiń (Polsha) «Aıǵa bılet» jáne Elıs Nellıstiń (Chehıa) «Jańarý» fılmderi talasqa túsken edi.

Halyqaralyq deńgeıdegi óner básekesinde ádilqazylar alqasynyń quramynda atalmysh sharanyń negizin qalaýshy Fıllıs de Pıchchıotto, rejıser Mımı deGrýı, avtor Telma Adams, aktrısa Arnett Djens Zerbe, akter Entonı Zerbe, montajer Artýr Shmıdt, akter Alan Tık, prodúser Ted Hoýp, kompozıtor Adam Gýttel pen aktrısa Frensıs Fısher boldy.

«Baýyr» fılminiń álemdik premerasy 70-shi Venesıadaǵy Halyqaralyq kınofestıval aıasynda ótti. İzinshe kartına «Eýrazıa» IX halyqaralyq kınofestıvaliniń negizgi konkýrstyq baǵdarlamasynda kórsetilip, birden úzdik rejıssýra marapatyn jáne NETPAK júldesin ıelendi. Ótken jylǵy kúzde fılm Avstrıada ótken Viennale halyqaralyq kınofestıvaline qatysqan.

Santa-Barbarada halyqaralyq kınofestıval 1985 jyldan beri ótkizilip keledi.