Qazaqstannyń Túrkıadaǵy elshiligi eldegi jaǵdaıǵa baılanysty respýblıka azamattaryna úndeý jasap, saqtyq sharalaryn saqtaýǵa shaqyrdy.

Elshilik qalyptasqan jaǵdaıǵa baılanysty qazaqstandyqtardy:

Halyq kóp jınalatyn oryndarǵa barmaýǵa;

Sherýler men mıtıńilerge qatyspaýǵa;

Kúsheıtilgen qaýipsizdik sharalaryn saqtaýǵa; 

Qyraǵylyq pen saqtyqqa;

Jańalyqtardy qadaǵalap, bıliktiń nusqaýlyqtaryn oryndaýǵa;

Qazaqstannyń Túrkıadaǵy dıplomatıalyq ókildikterimen baılanysta bolýǵa shaqyrdy.

Sonymen qatar áleýmettik jelide mıtıńter týraly aqparatty jáne bolǵan oqıǵalarǵa qatysty baǵa berip, pikir bildirýden aýlyq bolyńdar dep eskertti. 

Qazaqstannyń Túrkıadaǵy sheteldik ókildikteriniń jedel jeli telefondary:

1. Qazaqstan Respýblıkasynyń Ankaradaǵy Elshiligi: +905352734496

2. Qazaqstan Respýblıkasynyń Ystanbuldaǵy Bas konsýldyǵy: +905012621465

3. Qazaqstan Respýblıkasynyń Antalıadaǵy Bas konsýldyǵy: +905394400522

4. Qazaqstan Respýblıkasynyń Izmırdegi Bas konsýldyǵy: +905530998789

Eske salaıyq, buǵan deıin 19 naýryzda Ystambul meri jáne onyń serikteri ustaldy. Shendilerdi jemqorlyq, paraqorlyq jáne satyp alý áreketterine qatysy bar dep aıyptady.

Sheneýnikterdi polısıa 4 kún boıy qamaýda ustaıdy dep josparlanǵan. Qalada jappaı tártipsizdikterdiń aldyn alý úshin 4 kúnge narazylyq aksıalaryna tyıym salyndy. Kólik qozǵalysyna jáne metro jelileriniń jumysyna shekteýler engizildi. Keıin búkil Túrkıada jappaı narazylyqtar bastalyp, olardyń áli de jalǵasýy múmkin ekeni aıtyldy.

Buǵan deıin Túrkıanyń Bas prokýratýrasy Imamoglýnyń "bıznes basqarý" mamandyǵy boıynsha alǵan dıplomynyń shynaıylyǵy men zańdy kúshin tekserý úshin Ystambul ýnıversıtetine suraý salǵan. Onyń Soltústik Kıprdegi ýnıversıtetten Ystambulǵa aýysýy kezinde zań buzýshylyqtar bolǵany týraly kúdik týǵan. Óıtkeni sol kezde bul oqý orny Túrkıa tarapynan resmı moıyndalmaǵan. Buǵan baılanysty 17 naýryzda Ystambul ýnıversıteti Imamoglýnyń dıplomyn jaramsyz dep tanydy. Bul onyń prezıdenttik saılaýǵa qatysýyna qıyndyq týǵyzýy múmkin.