Túrkıadaǵy jer silkinisi kezinde zardap shekkenderdiń ishinde qazaqstandyqtar joq.

Bul týraly Qazaqstannyń syrtqy ister mınıstrligi málimdedi.

Sáýirdiń 23-i kúni Túrkıanyń Ystanbul qalasynda 6,2 baldyq jer silkinisi boldy. Qazir aftershoktar jalǵasýda.

"Qazirgi ýaqytta Túrkıada júrgen Qazaqstan azamattarynan Ystanbuldaǵy bas konsýldyqqa eshqandaı ótinish túsken joq. Mınıstrlik jaǵdaıdy Túrkıa bıligimen jáne Qazaqstannyń Túrkıadaǵy dıplomatıalyq ókildikterimen birlese qadaǵalap otyr", – dep habarlady mınıstrlik.

Ystanbuldaǵy Qazaqstannyń bas konsýldyǵynyń konsýldyq esebinde 1 137 Qazaqstan Respýblıkasynyń azamaty tirkelgen.

Elshilik qaladaǵy qazaqstandyqtardy sabyr saqtaýǵa, barynsha saqtyq tanytýǵa jáne jergilikti bıliktiń barlyq nusqaýlaryn múltiksiz oryndaýǵa shaqyrdy.

Aıta keteıik, Ystambýlda jer silkinisi kezinde qoryqqannan bıikten sekirgen 151 adam jaraqat alǵan.

“Qorqyp bıikten sekirgen 151 adam jaraqat aldy. Olar aýrýhanada em alyp jatyr. Ómirlerine qaýip tónip turǵan joq", – dep habarlady Ystanbul ákimshiligi.

Túrkıa parlamentiniń tóraǵasy jer silkinisine qatysty pikir bildirdi.

“Ystambýl men aınalasynda sezilgen qatty jer silkinisimen bitpe-bet keldik. Bul jer silkinisin eshqandaı zardapsyz ótkeremiz dep úmittenemiz. Alaıda Ystambýlda boljanǵan aýyr jer silkinisi kez kelgen ýaqytta bolýy yqtımal. Sondyqtan jan-jaqty daıyn bolýymyz kerek”, – dedi Nýman Kýrtýlmýsh.