Teplıchnoe aýylyndaǵy bala kómegi: bir jaǵynan — úlgi, ekinshi jaǵynan — zań buzýshylyq
Birer kún buryn Soltústik Qazaqstan oblysy ákimdiginiń baspasóz qyzmeti Teplıchnoe aýylyndaǵy bógetti nyǵaıtý jumystaryna úlkendermen birge atsalysyp júrgen bala týraly habarlap, onyń áreketin elge úlgi etken bolatyn. Beınerolıkte jasóspirimniń kvadrosıklmen qap tasyp júrgen sáti kórsetilgen.
Ákimdik Rýslan men Dınara Myrzabaı otbasyn birliktiń jáne týǵan jerge degen janashyrlyqtyń jarqyn úlgisi retinde atap ótti. «Olar aýyl turǵyndarymen birge bógetti nyǵaıtý jumysyna belsene qatysýda. Uldary Dastan da úlkenderge kómektesip, óz kvadrosıklinde qap tasyp, qorǵanys nysandaryn kúsheıtýge atsalysýda. Bul — ózgelerge úlgi bolarlyq is», – delingen ákimdik málimdemesinde.
Alaıda bul áreket qoǵamda eki túrli pikir týǵyzdy. Áleýmettik jeli qoldanýshylarynyń biri: «Bul balanyń qajetti sanattaǵy júrgizýshi kýáligi bar ma?» – dep saýal tastady.
Osyǵan baılanysty Soltústik Qazaqstan oblysynyń polısıa departamenti túsinikteme berdi. Vedomstvo málimetinshe, 26 sáýir kúni Teplıchnoe aýylynda bógetti bekitý kezinde 34 jastaǵy turǵyn óziniń 10 jastaǵy ulyna kvadrosıkl júrgizýge ruqsat bergen. Bul áreket QR Ákimshilik quqyq buzýshylyq týraly kodeksiniń 612-baby 5-bóligine sáıkes quqyqbuzýshylyq bolyp sanalady – ıaǵnı, kólik quralyn basqarý quqyǵy joq adamǵa kólik tizginin berý.
Sonyń nátıjesinde balanyń ákesine 50 aılyq eseptik kórsetkish (AEK) kóleminde, ıaǵnı 196 600 teńge mólsherinde aıyppul salyndy (1 AEK – 3 932 teńge).
Bir jaǵynan — azamattyq belsendilik pen patrıotızm, ekinshi jaǵynan — zań talaptarynyń buzylýy. Bul oqıǵa qoǵamda tárbıeniń, jaýapkershiliktiń jáne zańdy saqtaýdyń araqatynasyn taǵy bir márte oılanýǵa túrtki boldy.