Qazaqstan Respýblıkasynyń Prezıdenti Qasym-Jomart Toqaevtyń Torǵaı, Arqalyq óńirleri arqyly ótip, Astana men batys aımaqtardyń arasyndaǵy jol ýaqytyn qysqartýdy kózdeıtin strategıalyq mańyzy bar jobany tikeleı baqylaýǵa alǵany, sóz joq, qoldaıtyn bastama. Torǵaı óńirindegi úsh aýdan, Arqalyq qalasy damý kóshinen keıin qalmasyn desek, úlken joldyń túsýi – birinshi kezektegi mindet.
Osy Torǵaı óńirin túlete otyryp, Astana men batys aımaqtardy tikeleı baılanystyryp, nátıjesinde 700 shaqyrymǵa deıin jol qysqartatyn jobanyń baǵyttary el arasynda daý týǵyzdy.
Býrabaıda ótken tórtinshi Ulttyq quryltaıda Prezıdent Qasym-Jomart Toqaev «Osy tusta taǵy bir mańyzdy ınfraqurylymdyq joba qolǵa alynatyny týraly jarıalaǵym keledi. Men Úkimetke Astanadan Arqalyq, Torǵaı jáne Yrǵyz arqyly Transkaspıı halyqaralyq kólik dálizine týra shyǵatyn avtokólik jolynyń qurylysyn bastaýdy tapsyrdym. Jańa kúrejol ortalyq jáne batys aımaqtardyń arasyn 560 shaqyrymǵa qysqartady. Bul – tutas Torǵaı óńiriniń damýyna tyń serpin beretin aýqymdy joba», – dep arnaıy tapsyrma bergen bolatyn.
Artynsha Qostanaı oblysynyń ákimi Qumar Aqsaqalov pen sol kezdegi Kólik vıse-mınıstri Sátjan Ablalıev Transkaspıı halyqaralyq kólik dálizine shyǵatyn «Ortalyq-Batys» avtojolynyń Astana-Egindikól-Baýmanskoe-Sochınskoe-SHalǵaı Shoıyndykól-Arqalyq-Jaldama-Amangeldi-Torǵaı-Aqshyǵanaq-Yrǵyz baǵyty qurylysynyń bastalǵanyn habarlap, lentasyn qıǵan. Biraq Kólik mınıstrligi tarapynan komısıa qurylyp, jol jobasynyń saraptama deńgeıinde ekenin, baǵyttardy aıqyndaý úshin halyqpen kezdesýler ótkizilip jatqany týraly aqparat tarady.
«Aıqyn» gazetinde osy másele kóterilgende Kólik vıse-mınıstri Maqsat Qalıaqparov Memleket basshysynyń tapsyrmasy bólek oryndalatynyn, sondaı-aq bul avtojol Ulytaý oblysyna burmalanbaıtynyn, «Astana – Ulytaý» baǵyty boıynsha derbes joba ázirlenip jatqanyn aıtqan-dy.
Búgin QR Prezıdentiniń kómekshisi – baspasóz hatshysy Rýslan Jeldibaı Memleket basshysynyń Úkimetke dál osy «Torǵaı – Yrǵyz» avtojolynyń qurylysyn jedeldetýdi tapsyrǵanyn jarıalady.
Igi jobany júzege asyratyn asa mańyzdy Prezıdent bastamasynyń oryndalýyna qandaı kedergiler bar? Jobalaý-smetalyq qujattama bekitilgen joba boıynsha ǵana ázirlenbeýshi me edi? Qarjylandyrý kózi qandaı jáne joba merzimi qandaı? Uly istiń aınalasyndaǵy aqparat jurtqa qoljetimdi bolsa, eshkim syrttan ton pishpeı, tileýlestik tanytar edi-aý...
