Sırıa Arab Respýblıkasynyń prezıdenti Ahmad ash-SHaraa Naýryz meıramyn memlekettik deńgeıde atap ótý týraly jarlyqqa qol qoıdy. Endi 21 naýryz el aýmaǵynda resmı aqyly demalys kúni bolyp esepteledi.
Sırıanyń memlekettik SANA agenttiginiń habarlaýynsha, prezıdent qol qoıǵan qujattyń besinshi babynda Naýryz meıramy ulttyq merekeler tizimine engizilgen. Osy sheshimge sáıkes, 21 naýryzda memlekettik mekemelerdiń qyzmetkerleri jalaqysy saqtalatyn demalysqa shyǵady.
Jarlyq mátininde Naýryz kóktemniń kelýin, beıbitshilik pen ózara syılastyqty bildiretin ortaq mádenı mereke retinde sıpattalǵan. Mereke Sırıa Arab Respýblıkasynyń búkil aýmaǵynda birdeı atap ótiledi.
Sonymen qatar, qujatta kúrd tili arab tilimen qatar ulttyq til mártebesine ıe bolatyny kórsetilgen. Buǵan qosa, etnıkalyq nemese tildik erekshelikterine baılanysty kemsitýdiń kez kelgen túrine zań júzinde tyıym salynatyny atap ótilgen.
Bul qadam Sırıada uzaq jyldarǵa sozylǵan qaqtyǵystan keıin qolǵa alynǵan reformalar aıasynda qabyldandy. Bılik bul sheshim qoǵamdaǵy birlikti kúsheıtip, eldegi kópetnosty qurylymnyń quqyqtaryn moıyndaýǵa baǵyttalǵanyn málimdedi.
