Irannyń joǵarǵy kóshbasshysy aıatolla Álı Hameneı AQSH-tyń burynǵy prezıdenti Donald Trampty «qylmysker» dep atap, Tegerandaǵy jappaı narazylyqtarǵa Vashıngtonnyń tikeleı qatysy bar ekenin málimdedi. Bul – Hameneı tarapynan narazylyq kezindegi adam shyǵynyna alǵash ret ashyq pikir bildirýi.

17 qańtar kúni memlekettik telearna arqyly sóılegen sózinde Hameneı antıúkimettik mıtıńiler saldarynan «birneshe myń adam qaza tapqanyn» aıtty. Onyń sózinshe, AQSH bıligi sherýshilerdi ashyq qoldap, olardy áreketterin jalǵastyrýǵa shaqyrǵan.
«AQSH prezıdenti bul kóterilis kezinde jeke ózi úndeý jasap, mıtıńilerdi qoldaıtynyn, tipti áskerı qoldaý kórsetýge daıyn ekenin aıtty», – dedi Irannyń joǵarǵy kóshbasshysy.

Hameneı narazylyqqa shyqqandardy «AQSH-tyń jaıaý áskerleri» dep atap, olardyń meshitter men bilim berý mekemelerin qıratqanyn, sondaı-aq shetelden jetkizilgen qarý-jaraq qoldanǵanyn alǵa tartty. 

Sonymen qatar, sońǵy ıran shahynyń uly Reza Pehlevı AQSH-ty rejımniń «áskerı qurylymdaryna» núktelik soqqy jasaýǵa shaqyrdy. Politico dereginshe, ol Vashıngtonda birqatar kezdesý ótkizip, bılik aýysqan jaǵdaıda ótpeli kezeńdi basqarýǵa daıyn ekenin bildirgen.

Aımaqtaǵy shıelenis dıplomatıalyq málimdemelerge qaramastan saqtalyp otyr. Amerıkalyq BAQ AQSH-tyń Taıaý Shyǵysqa qosymsha áskerı kúshter jiberýdi qarastyryp jatqanyn habarlaıdy.