Fransıanyń Ulttyq assambleıasy 15 jasqa deıingi balalarǵa áleýmettik jelilerdi qoldanýǵa tyıym salatyn zań jobasyn qabyldady. Endi zań Senattyń qaraýyna jiberiledi.
Bul bastamany prezıdent Emmanýel Makron qoldap otyr. Onyń aıtýynsha, zań balalardy shamadan tys ekran ýaqyty men áleýmettik jelilerdiń keri áserinen qorǵaýǵa baǵyttalǵan. Sonymen qatar, qujatta lıseılerde uıaly telefon qoldanýǵa tyıym salý da qarastyrylǵan.
Zań kúshine ense, Fransıa Avstralıadan keıin mundaı qadamǵa barǵan ekinshi el bolmaq. Bılik jańa talaptardy 2026–2027 oqý jylynan bastap engizýdi josparlap otyr.
Bılik ókilderi áleýmettik jelilerdiń jasóspirimderdiń psıhıkalyq densaýlyǵyna keri áseri, kıberbýllıng pen zıandy kontent qaýpi artqanyn atap ótti. Al keıbir saıasatkerler bul tyıymdy «shamadan tys baqylaý» dep synǵa aldy.
