Qazaqstanda azyq-túliktiń quny óspes úshin bıyl el Úkimeti áleýmettik mańyzy bar taýarlardyń shekti baǵasyn bekitedi, dep habarlaıdy Tengrinews.kz tilshisi Premer-mınıstr Serik Ahmetovke silteme jasap. "Sondaı-aq janar-jaǵar maı baǵasy rettelip, qatań baqylanatyn bolady", - dedi búgin S.Ahmetov Prezıdent N.Nazarbaevtyń qatysýymen Aqordada ótip jatqan Úkimettiń keńeıtilgen májilisinde. Úkimet basshysy atap kórsetkendeı, búginde baǵa salasyndaǵy qıynshylyqtardyń basym bóligi syrttan keletin taýarlarmen baılanysty bolyp tur. Sebebi qajetti qurylǵylar men materıaldar sheteldik valútaǵa satyp alynady. Biraq Premer osy saladaǵy jaǵdaıdy da jan-jaqty zerdelep, tıisti sharalardy qolǵa alýdy kózdeıdi. Aıta ketken jón, búginde elimizdegi azyq-túliktiń baǵasy turaqtandyrý qorlaryndaǵy rezervke tikeleı baılanysty. Dál qazir onda barlyǵy 43 myń tonna taýar bar. Degenmen, onyń da baǵasy syrttan keletin azyq-túlikke táýeldi bolyp tur. Buǵan deıin aýyl sharýashylyǵy mınıstri Asyljan Mamytbekov atap kórsetkendeı, teńge baǵamynyń ózgerýi syrtqy taýardyń qymbattaýyna sebep bolady. "Ol túsinikti jáıt. Oǵan qarsy ákimshilik sharany qoldaný qıyn. Sebebi ony múldem ákelmeı qoıýy múmkin. Sonyń saldarynan tapshylyq bolyp, ishki taýarlardyń baǵasy da kóteriledi", - deıdi mınıstr A.Mamytbekov. Sondyqtan búgingi turaqtandyrý qorlarynda bar taýardy uqsata bilgen jón. Bir ókinishtisi, keıbir qorlarda "rezerv" taýarlar múldem joq. "Olarǵa bólingen aqsha depozıtterde jatýy yqtımal", - dep atap kórsetken bolatyn mınıstr. Demek, keıbir aımaqtarda (mınıstr naqty aıtqan joq - avt.) qymbatshylyq bolýy ábden múmkin. Biraq nannyń baǵasy kóterilmeýi tıis. Bul týraly Alash aınasy gazeti de jazǵan. Arman Asqarov