Euronews-tiń Bas dırektory Maıkl Pıters Qazaqstandaǵy eń iri medıaholdıng bolyp esepteletin "Habar" agenttigi AQ-nyń táýelsiz dırektory qyzmetine taǵaıyndaldy, dep habarlaıdy Tengrinews.kz tilshisi agenttiktiń baspasóz qyzmetine silteme jasap. Maıkl Pıters agenttiktiń qańtardyń 13-i kúni ótken Dırektorlar keńesiniń kezekti jıynynda tanystyryldy. Maıkl Pıters "Habar" agenttigine qyzmetke tartylǵan úshinshi táýelsiz dırektor. "Maıkl Pıters sekildi kásibı deńgeıi asa joǵary mamannyń kompanıamyzǵa qyzmetke kelýin biz árıne quptaımyz. Shynyn aıtqanda, televıdenıe kúrmeýi kóp sala bolyp tabylady. Al, sol salanyń shyńynan kórinip júrgen mamandar bizdiń elimizde saýsaqpen sanarlyqtaı ǵana. Pıters myrzaǵa bizdiń shaqyrtýymyzdy qabyl alǵany úshin sheksiz alǵysymyzdy bildiremiz. Onyń 1993 jyldan beri úzdiksiz damý ústinde bolǵan Euronews-te jınaǵan tájirıbesi mol", - dedi "Habar" agenttigi AQ Dırektorlar keńesiniń tóraǵasy Aıdos Úkibaev. Úkibaev myrzanyń sózine qaraǵanda, "Habar" agenttigi táýelsiz dırektorlardy qyzmetke tartý arqyly holdıńtiń korporatıvti júıesin jyldam, ári sapaly túrde damytýdy aldyna maqsat etip qoıyp otyr. Maıkl Pıters Germanıa jáne Fransıa azamaty bolyp tabylady. Ol Euronews-te 1998-shi jyldan beri jumys istese, 2000-shy jyldan beri basshylyq qyzmetterde. Atap aıtqanda, Pıters myrza arnanyń qarjy jáne basqarýshy dırektory, odan ári Atqarýshy keńestiń dırektory, al 2011-shi jyldan bastap Atqarýshy keńestiń tóraǵasy bolyp qyzmet etedi.