Búdjetten bólingen mıllıardtar naýqastarǵa jeter emes. Onyń ústine shalasaýatty aq halattylar durys dıagnoz qoıa almaı, saldarynan shıpa izdep kelgen syrqattar ólip ketip nemese múgedek atanyp jatyr. Búgin Májiliske esep berýge kelgen elimizdiń bas dárigeri depýtattardyń osyndaı qatal synyna ushyrady. Kútpegen jerden kúshke mingen halyq qalaýlylary jurtqa paıdasy joq mınıstrlikti jabý kerek dedi.
DepýtattarbastapqydaSalıdat Qaıyrbekovany jyly shyraımen qarsy aldy. Mine, mınıstr Májilistiń kire berisine kórmesin jaıyp tastap, jetistikterin qyzmetkerlerimen jarysa tanystyryp júr. Tómengi palataǵa jyldyq esebin berýge kelgen vedomstva basshysy ári qaraı sandardy sóıletti.
Salıdat Qaıyrbekova, QR Densaýlyq saqtaý mınıstri:
-Elimizde byltyr ólim kórsetkishi 4,8, al ana ólimi 6,7, nárestelerdiń shetineýi – 17 paıyzǵa azaıdy. 2030 jyly eýropalyq kórsetkishpen teńesemiz. Munyń bárine alǵashqy medısınalyq kómektiń sapasyn jaqsartý arqyly jetip otyrmyz.
Shyndyǵynda mınıstrdiń baıandamasyndaǵydaı jurttyń densaýlyǵy jappaı jaqsaryp ketpepti. Byltyr Qaıyrbekova hanymnyń qaramaǵyndaǵy 500 dáriger dıagnoz qoıa almaı, qanshama adamnyń kóz jasyna qalǵany úshin jaýapqa tartylǵan. Janserik Isa sondaı dárigerlerdiń qurbany. Astanalyq aq halattylar ishi aýyryp aldaryna kelgen jigittiń ashshy ishegine operasıa jasaǵan. Biraq otadan keıin naýqastyń kózi kórmeı qaldy.
Ardaq Myrzanova, naýqastyń anasy:
-Eshqandaı tekserýsiz, analız almastan «apendısıt» dep dıagnoz qoıyp, operasıa jasaǵan. Biraq úshinshi kúni balam reanımasıaǵa tústi. Qaıta operasıa jasady.
Mundaı taǵdyrlar myńdap sanalady. Medısına qyzmetkerleriniń saýatsyzdyǵynanmúgedek bolyp qalyp jatyr. Búdjetten bul salaǵa mıllıardtap teńge bólinse de, syrtqatqa sapaly qyzmet kórsete almaı-aq qoıdy. Dáriger biliksiz, sosyn bitpeıtin reforma. Tipti mınıstrlik aımaqtardaǵy ahýaldy baqylaýsyz qaldyryp, jergilikti ákimdikterge senip alǵan. Osyndaı jaýapsyzdyqty depýtattar qatal synǵa aldy.
Darıǵa Nazarbaeva, Májilis depýtaty:
-Mınıstrliktiń kez-kelgen suraqqa jalǵyz jaýaby bar. Dári-dármekke «SK-Farmasıa» kompanıasy, medısınalyq qural-jabdyqpen qamtýǵa «KazMedTeh» AQ, al qalǵan máselege jergilikti ákimdik «jaýap beredi» dep bekitip qoıǵan. Sóıtip jaýapkershilikten qashyp otyr. Endeshe mundaı mınıstrlikti jaýyp tastaıyq.
Muny estigen Salıdat hanymnyń mazasy qashty. Daýsy dirildep, keıbir suraqtarǵa jazbasha «jaýap beremin» dep sasty. Tipti májilismenderdiń arasynda mınıstrge jany ashyp, ornyna otyrýyn suraǵandar da boldy.
Qurmetti áriptester, múmkin Salıdat Jákenqyzy ornynda otyryp jaýap bersin.
– Joq, qajet emes.
-Jalpy, Densaýlyq saqtaý mınıstrligi qazynadan qarjy eń kóp bólinetin vedomstva. Bıylǵy búdjeti 862 mıllıard teńge eken. Biraq, bul salaǵa ketken shyǵynnyń qaıtarymy bolmaı tur. Jurt áli kúnge deıin tegin dári-dármekke jarymaǵan, aýyldyq jerdegiler aýrýhanaǵa jete almaı jylap júr. Al depýtattardyń qatal synyna ushyraǵan elimizdiń bas dárigeri bolsa olqylyqty «túzeımin» dep taǵy ýáde berip ketti.
KTK arnasy
