Qazaqstandyq bankterdiń bankrotqa ushyraıtyndyǵy týraly jalǵan aqparat taratqan birneshe adam anyqtaldy. Bul týraly búgin QR Bas prokýratýrasynyń resmı ókili Nurdáýlet Súıindikov málim etti. «Bankterdiń qarjylyq ahýaly jónindegi aqparattarǵa qatysy bar barlyq tulǵalardy anyqtaý boıynsha keshendi izdestirý sharalary júrgizilýde. Birqatar tulǵalar anyqtaldy jáne olarǵa qatysty tekserý sharalary bastaldy», - dedi ol. Onyń atap ótýinshe, talap aryz engizilip, qylmystyq is qozǵaý máselesi sheshilýde. "Bas prokýratýra jalǵan habarlamalardy taratýǵa kináli tulǵalardyń barlyǵy qylmystyq qýdalanýmen qosa, materıaldyq jáne zańmen belgilengen ózge de jaýapkershilikterge tartylatyndyǵyn málimdeıdi", - dedi N.Súıindikov. Qazaqstan Respýblıkasy Bas prokýratýrasynyń MÁLİMDEMESİ Sońǵy kúnderi ár túrli komýnıkasıa quraldary arqyly (áleýmettik jelilerdi qosa alǵanda ınternet-habarlamalar, SMS) «Sentr Kredıt» Banki, «Kaspıı Banki» jáne «Aláns bankiniń» bankrot bolý múmkindigi týraly aqparat tarala bastaǵany málim. Osy habarlamalar atalǵan bankilerdiń salymshylaryn dúrliktirip, olardy banktik shottardaǵy qarajattaryn jappaı alýǵa ıtermeleýde. Nátıjesinde, bul áreketter júıe quraýshy bankterge aıtarlyqtaı zıan keltirdi, qoǵamdaǵy áleýmettik shıelenistiń ósýine ákelip soqty, sondaı-aq eldegi qarjy ınstıtýttaryna degen turǵyndardyń senimine nuqsan keltirdi. Atalǵan bankterdiń bankrot aldyndaǵy jaǵdaıy týraly jalǵan aqparattyń eshbir negizi bolmaǵandyǵy jáne bolýy múmkin emestigi anyqtaldy. Sáıkesinshe, taratylyp jatqan málimetter kórineý jalǵan bolǵan jáne banktik saladaǵy ahýaldy turaqsyzdandyrýǵa baǵyttalǵan. Qazirgi ýaqytta quqyq qorǵaý organdary tıisti aryzdardyń negizinde bankterdiń qarjylyq ahýaly jónindegi jalǵan aqparatqa qatysy bar barlyq tulǵalardy anyqtaý jónindegi jedel-izdestirý sharalaryn keshendi túrde júrgizýde. Birqatar tulǵalar anyqtaldy jáne olarǵa qatysty qajetti tekserý sharalary júrgizilýde. Talap aryzdar berildi. Qazir qylmystyq is qozǵaý jónindegi másele sheshilýde. Bas prokýratýra jalǵan habarlamalardy taratýǵa kináli tulǵalardyń barlyǵy qylmystyq qýdalanýmen qosa, materıaldyq jáne zańmen belgilengen ózge de jaýapkershilikterge tartylatyndyǵyn jaýapkershilikpen málimdeıdi. BAQ ókilderinen qaralyp jatqan oqıǵalardy jarıa etý kezinde tek tekserilgen faktilerge súıenýge jáne shyndyqqa sáıkes kelmeıtin aqparattyń jarıalanýyna jol bermeýdi suraımyz.