Ýkraınanyń Joǵarǵy radasy kópshilik daýyspen Ýkraınanyń eks-premeri Iýlıa Tımoshenkony bosatýǵa múmkindik beretin zań qabyldady, dep habarlady Ýtro.rý

Eks-premer kináli dep tanylǵan Ýkraına QK 365-baby (bılikti nemese qyzmettik ókilettikti asyra paıdalaný) qylmysqa jatpaıtyn bolyp ózgertildi. Bul sheshimge 365 halyq depýtatynyń ishinen 310-y jaqtap daýys berdi.

Eks-premer jeti jyldyq merzimin Harkov oblysyndaǵy kolonıada óteýde. 2011 jylǵy qazanda Kıevtiń Pecherskıı aýdandyq soty ony 2009 jylǵy Reseımen gazǵa baılanysty kelisim jasasqan kezde ókilettigin asyra paıdalandy dep aıyptady da, jeti jylǵa bas bostandyǵynan aıyrǵan bolatyn. Sot sondaı-aq Tımoshenkonyń múlkin tárkilep, oǵan «Ýkraınanyń Naftogazy» UAK-qa $200 mıllıon tóleýge mindettegen.

Keıinnen eks-premerge tórt epızod boıynsha jańa aıyp taǵylyp, tórt qylmystyq is bir óndiriske biriktirilgen bolatyn.

11 aqpanda Tımoshenkoǵa Ýkraına prezıdenti ákimshiliginiń basshysy Andreı Klúev bardy. Opozısıadaǵy derekkózderdiń habarlaýynsha, kelissózder taqyryby saıası daǵdarystan birlesip shyǵý jolyn qarastyrý, Óńirler partıasy men Joǵarǵy radadaǵy «Batkıvshınanyń» kúshterin biriktirý jaıynda  órbigen.

Kelesi kúni eks-premer prezıdent Vıktor Ianýkovıchke ashyq pikirsaıysqa shyǵýdy usyndy.