Erteń Almatyda Dúnıejúzi qazaqtary qaýymdastyǵy úıinde «Kóshi-qonnyń búgingi jaǵdaıy» atty dóńgelek ústel ótip, onda Qazaqstan Respýblıkasy Prezıdentiniń 24 qarashada qol qoıǵan «Qazaqstan Respýblıkasynyń keıbir zańnamalyq aktilerine halyqtyń kóshi-qony jáne jumyspen qamtylýy máseleleri boıynsha ózgerister men tolyqtyrýlar engizý týraly» №421-V Qazaqstan Respýblıkasynyń Zańy talqylanady, - delingen qaýymdastyq taratqan habarlamada.
Habarlamada «Dúnıejúzi qazaqtarynyń qaýymdastyǵy bul zańnyń jobasyn daıyndaýǵa jáne ony talqylaýǵa belsendi túrde atsalysyp, QR Prezıdenti ákimshiligi men ózge quzyrly organdarǵa birneshe márte óz usynystaryn joldaǵan bolatyn. Usynysta sheteldegi etnıkalyq qazaqtardyń problemalary, etnıkalyq kóshi-qon, Qazaqstan qoǵamyna oralmandardyń beıimdelýi, olardyń yqpaldylyq máseleleri, Qazaqstan Respýblıkasynyń azamattyǵyn tez alý joldary sıaqtylar kórsetildi» delingen.
Aıta keteıik, resmı statısıka boıynsha 1991 jyldan 2015 jyldyń 1 qańtaryna deıin elimizge shet elderden 259 159 otbasy, ıaǵnı, 952 882 etnıkalyq qazaq kóship kelgen. Jańa zańnan keıin etnıkalyq kóshi-qonnyń jandanýy, kósh barysy qalaı bolatyny dóńgelek ústelde keńinen talqylanady.
Basqosýǵa QR İshki ister mınıstrligi, QR Syrtqy ister mınıstrligi, QR Densaýlyq saqtaý jáne áleýmettik damý mınıstrligi sıaqty quzyrly organdardyń ókilderi, qoǵamdyq uıymdardyń basshylary, oralmandar jáne ózge de belsendi azamattar qatysady dep kútilýde.
