2013 جىلى 11 ماۋسىمدا الماتى قالاسىنىڭ تۇرعىنى، قىتايدان كەلگەن قانداسىمىز ەرجاننىڭ وتباسى ورىنى تولماس قازاعا ۇشىراعان ەدى. ەرجاننىڭ ۇيىندە جوقتىعىن پايدالانىپ، ونىڭ جاقىن اعايىنى 19 جاستاعى ەلمۇرات شەشەنقۇل ۇلى مەن جارى نۇرگۇل مەنەسبايەۆانى(جۇكتى) ولتىرگەن قانىشەرلەر دالادا ويناپ جۇرگەن 7 جاستاعى سىلامنۇر مەن 3 جاستاعى سىرمۇحاممەتتى ۇيگە شاقىرىپ، تۇنشىقتىرىپ ولتىرگەن.
ەرتەسىندە-اق قولعا تۇسكەن قىلمىسكەرلەر – وزبەكستاننان كەلگەن ەڭبەك ميگرانتى يحبول تۇردييەۆ جانە تالدىقورعاندىق ەرلان مامرەيەۆ پەن باقىتجان مۇقاجانوۆتار بولاتىن.
5 اي بويى جۇرگىزىلگەن تەرگەۋ-تەكسەرۋ امالدارىنىڭ ناتيجەسىندە الماتى قالاسى قىلمىستىق ىستەر بويىنشا ارنايىلاندىرىلعان اۋدانارالىق سوتتىڭ ءتوراعاسى بۇلىتباي مامىتبەكوۆ قانىشەرلەردى ءومىر بويى قاماق جازاسىنا كەسكەن. ولاردىڭ مۇلىكتەرى تاركىلەنىپ، وزدەرى قاتاڭ رەجيمدەگى كولونياعا جابىلاتىن بولعان.
سوتتىڭ بۇل شەشىمى «كوڭىلىنەن» شىقپاعان قىلمىسكەرلەر الماتى قالالىق سوتىنا اپپەلەسيالىق شاعىم ءتۇسىرىپ، جازاسىن جەڭىلدەتۋدى سۇراعان. ياعني جۇكتى انانى، ەكى ءسابيدى، ءبىر ازاماتتى، جالپى 5 جان يەسىنىڭ قانىنا ورتاق بولعان ولار ءوز قىلمىستارىن «اۋىر ەمەس» دەپ ساناعان كورىنەدى. اسىرەسە باقىتجان مۇقاجانوۆ ءتىپتى ءوز باسىن اراشالاعىسى كەلىپتى.
بۇل جاعدايدان كەيىن ەرجان ساتىبالدى مىرزا رەداكسيامىزعا كەلىپ، مۇنداي باسسىزدىققا توزە المايتىندىعىن ايتىپ ەدى. ونىڭ ايتۋىنشا، ولاردىڭ سوتقا قايتا ارىز بەرۋى قىلمىسكەرلەردىڭ ادامدىقتان شىعىپ كەتكەندىگى، ارسىزدىقتىڭ ەڭ شىڭىنا جەتكەندىگىن كورسەتەدى. ايتپەسە قىرشىنداي ءسابيدى، جۇكتى انانى، جاس ازاماتتى ەش ويلانباستان قىرىپ سالعاندار قانداي كەشىرىم كۇتپەك. «اتتەڭ، ولارعا تەك ءولىم جازاسى لايىق ەدى»، – دەگەن ەدى ول.
ەرجان مىرزا جاڭا عانا حابارلاسىپ، العاشقى سوت شەشىمىنىڭ وزگەرىسسىز قالعانىن ءايتتى.
شىندىعىنا كەلسەك، بۇكىل قازاق ەلىن قارا جامىلدىرعان قانىشەرلەرگا – ءومىر بويعى قاماق ەمەس، ءولىم جازاسى لايىق ەدى.
