رەسەي ۋكرايناعا قارسى باسقىنشىلىق ساياسات ۇستانىپ وتىر. ۋكراينا وسى ۋاقىتقا دەيىن حالىقارالىق دەڭگەيدە مويىندالعان، شەكاراسى بەكىتىلگەن تاۋەلسىز مەملەكەت. قىرىمدى ۋكراينادان ءبولىپ قاراۋعا بولمايدى. قازىرگى ۋكرايناداعى جاعداي ولاردىڭ ىشكى شارۋاسى. رەسەيدىڭ «ءبىز ورىستىلدىلەردىڭ قۇقىعىن قورعايمىز» دەپ قىرىمعا ءوز ساياساتىن جۇرگىزۋدى كوكسەۋى ەشقانداي حالىقارالىق نورماعا سىيمايدى. ەگەر رەسەي وزگە ەلدەرمەن دە وسىنداي ساياسات ۇستاناتىن بولسا، وندا نەگىزىنەن ورىس تىلىندە سويلەيتىن قازاقستاننىڭ سولتۇستىك وبلىستارى وزدەرىن رەسەيدىڭ ءبىر بولشەگى رەتىندە سەزىنەرى انىق. مۇنداي جاعدايدا ولار ەشقاشان قازاقستاننىڭ تىلەۋىن تىلەمەيدى. ەگەر ۋكراينا قىرىمنان ايىرىلاتىن بولسا، وندا مۇنداي ءقاۋىپ ءبىزدىڭ دە باسىمىزعا ءتونىپ تۇرعاندىعىن جاسىرۋعا بولمايدى. سوندىقتان ەرتەڭگى كۇنى ءوز باسىمىزعا كەلەتىن جايتتان بۇگىن ارىلۋ ءۇشىن رەسەيدىڭ شوۆينيستىك شابۋىلىنا جول بەرمەگەن ءجون. ونىڭ ۇستىنە الەمدىك دەڭگەيدە ءوز ىقپالىن، ءوز ساياساتىن جۇرگىزىپ وتىرعان ۇلكەن سەگىزدىك كوزقاراسىمەن دە ساناسۋعا تۋرا كەلەدى. جانە ءبىز ولاردىڭ كوزقاراسىن اقىماقتىق دەي المايمىز. ۆ.پۋتين جيرينوۆسكييدىڭ اۋزىمەن قازاقستان جانە ورتالىق ازيا رەسپۋبليكالارىن رەسەيدىڭ بودانى ەتكىسى كەلەتىنىن انىق سەزدىردى دە.
ءپۋتيننىڭ دوللار اۋماعىنان شىعامىز دەۋى دە وڭ شەشىم ەمەس. قازىرگىدەي الماعايىپ زاماندا جاڭا ۆاليۋتانى اينالىمعا ەنگىزۋ ەكونوميكالىق جانە ساياسي قاتەلىكتەرگە ۇرىندىرادى. مۇنىڭ سوڭى – جاپپاي داعدارىس. داعدارىس سوڭى – اراب ەلدەرىندەگىدەي توڭكەرىسكە الىپ بارۋى مۇمكىن. سوندىقتان رەسەيدىڭ بۇگىنگى سولاقاي ساياساتىنا جول بەرۋگە بولمايدى.
قازاقستان رەسەيدىڭ جاڭا كەڭەستىك وداق قۇرۋ نيەتىمەن ۇيىمداستىرعان كەدەندىك وداعىنان، الدا قول قويىلۋى كۇتىلىپ وتىرعان ەۋرازيالىق ەكونوميكالىق كەڭىستىگىنەن ۇزىلدى-كەسىلدى باس تارتۋعا ءتيىس دەپ ەسەپتەيمىز!
«حالىق وكىلدەرى قۇرىلتايى» قۇرعان
قازاق ۇلتتىق كەڭەسىنىڭ اتىنان مۇحتار شاحانوۆ
