قارۋلى كۇشتەردىڭ جوعارعى باس قولباسشىسى – قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ توراعالىعىمەن وتكەن كەڭەسكە مينيسترلىكتىڭ جانە ق ر قك باس شتابىنىڭ باسشىلىعى، دەپارتامەنتتەر مەن باس باسقارمالار باستىقتارى، اسكەر تۇرلەرىنىڭ باس قولباسشىلارى مەن قولباسشىلارى قاتىستى، - دەپ حابارلايدى اقوردانىڭ باسپا ءسوز قىزمەتى.
مەملەكەت باسشىسى ەلدىڭ قورعانىس قابىلەتىن نىعايتۋ ماسەلەسىنە ءاردايىم زور كوڭىل بولىنەتىنىن اتاپ ءوتتى.
– قازاقستاندىقتار ارميانىڭ جاۋىنگەرلىك قابىلەتتىلىگىنە جانە ءوز مىندەتتەرى مەن جوعارعى باس قولباسشىنىڭ بۇيرىقتارىن ورىنداي الاتىنىنا سەنىمدى بولۋعا ءتيىس. سوڭعى جىلدارى ارميانى قارجىلاندىرۋ بارىنشا ارتتى، ءۇشجىلدىق بيۋدجەت جيىنتىعى ءبىر تريلليون تەڭگەگە جاقىندادى. ال بۇل ءتىپتى ەۋروپانىڭ باي ەلدەرى اسكەري شىعىندارىن عانا ەمەس، الەۋمەتتىك باعدارلامالارىن قىسقارتۋعا ءماجبۇر بولىپ وتىرعان الەمدەگى ەكونوميكالىق جاعدايلاردىڭ قازىرگىدەي قيىن كەزىندەگى جاعداي. مەملەكەت قارۋلى كۇشتەر مەن اسكەري قىزمەتشىلەر ءۇشىن بارلىعىن جاساۋدا. تەك وتكەن جىلى عانا 7 مىڭعا جۋىق اسكەري قىزمەتشى تۇرعىن ۇيمەن قامتاماسىز ەتىلدى، 5430 ادامعا تۇرعىن ءۇي جالداۋعا وتەماقى تولەندى. قارۋلى كۇشتەر وفيسەرىنىڭ اقشالاي ۇلەسىنىڭ ورتاشا مولشەرى – 170 مىڭ تەڭگە. اسكەري قىزمەتشىلەردى زەينەتاقىمەن قامتاماسىز ەتۋ – ەل ازاماتتارىنىڭ بارلىق ساناتى اراسىندا ەڭ جوعارى دەڭگەيدە. مۇنداي قامقورلىققا جاۋاپ رەتىندە قازاقستان حالقى ارميامىزدان – جوعارى جاۋىنگەرلىك دايىندىق، ال اسكەري قىزمەتشىلەردەن – كىرشىكسىز تازالىق كۇتۋگە قۇقىلى، – دەدى نۇرسۇلتان نازاربايەۆ.
قازاقستان پرەزيدەنتى مينيسترلىكتىڭ ورتالىق اپپاراتىنىڭ جانە وڭىرلىك قولباسشىلىقتىڭ، ءارتۇرلى اسكەر تۇرلەرىنىڭ جەتەكشىلەرى قويعان مىندەتتەردى ورىنداۋدا حالىق الدىندا جاۋاپتى ەكەنىنە نازار اۋداردى.
– ءبىز اسكەري ءونىمدى تەك رەسەيدەن ەمەس، وزگە ەلدەردەن دە ساتىپ الامىز. ارميانىڭ الەمدىك ساناتتاعى وزىق ۇلگىلەردى قولدانا وتىرىپ، قايتا جاراقتانۋعا مۇمكىندىگى بار. ءبىز بۇل باعىتتا ەشكىمنەن ارتتا قالۋعا ءتيىس ەمەسپىز. ەلدىڭ اسكەري-ونەركاسىپتىك كەشەنى تىكۇشاقتار، اسكەري وپتيكا، راديولوكاسيا جانە راديوەلەكتروندى كۇرەس جۇيەلەرىن قۇراستىرۋعا كىرىستى، سونداي-اق اسكەري-تەڭىز فلوتى ءۇشىن كەمەلەر جاسالۋدا، اۆياسيالىق جانە بروندى تەحنيكا جوندەۋ ءىسى ۇيىمداستىرىلعان. ءبىراق بۇل دا جەتكىلىكسىز، ول جۇمىس اياسىن كەڭەيتە ءتۇسۋ كەرەك، – دەدى قازاقستان پرەزيدەنتى.
مەملەكەت باسشىسى جاڭا قورعانىس زاۋىتتارىن سالۋ ەلدىڭ يندۋستريالىق دامۋىنىڭ ماڭىزدى باعىتىنىڭ ءبىرى ەكەنىن ايتتى.
– اسكەري زاۋىتتار جۇمىسى ەسەبىنەن وزگە سالالار دا داميدى، سونداي-اق ەكونوميكانىڭ باسقا سەكتورلارىنان تاپسىرىستار تۇسە باستايتىن بولادى. سوندىقتان قورعانىس ءمينيسترى ۇكىمەتپەن بىرلەسىپ، قانداي نىساندار سالاتىنىمىزدىڭ ايقىن جوسپارىن جاساۋعا ءتيىس. ماسەلەن، پاتروندار مەن سناريادتار ءوندىرىسى ماسەلەلەرىن كەيىنگە قالدىرۋعا بولمايدى. اسكەري-تەحنيكالىق جاڭعىرتۋ قارقىنىن ودان ءارى ۇدەتە ءتۇسىپ، ارميامىزدىڭ قايتا جاراقتاندىرىلۋى ۇدەرىسىن جانداندىرۋ قاجەت. تەك قارۋلى كۇشتەردى عانا ەمەس، قۇقىق قورعاۋ ورگاندارى مەن ارناۋلى قىزمەتتەردى دە قامتاماسىز ەتۋ ءۇشىن ەلدىڭ اسكەري-تەحنيكالىق كاسىپورىندارى شىعاراتىن ونىمدەر نومەنكلاتۋراسىن ودان ءارى كەڭەيتكەن ءجون، – دەدى نۇرسۇلتان نازاربايەۆ.
مەملەكەت باسشىسى قارۋلى كۇشتەر قاتارىنداعى كادر جۇمىسىنا وزگەرىستەر ەنگىزۋ قاجەتتىگىنە نازار اۋداردى.
– قارۋلى كۇشتەردىڭ نەگىزى – وفيسەرلەر، سەرجانتتار، ياعني ءوز ءومىرىن سانالى تۇردە وتانىنا قىزمەت ەتۋگە ارناعان ادامدار. تاربيەلىك جانە پاتريوتتىق جۇمىستاردى جەتىلدىرۋ، سولداتتان گەنەرالعا دەيىنگى مورالدىق رۋحتى كۇشەيتۋ جونىندە قوسىمشا شارالار قابىلداۋ قاجەت، – دەدى قازاقستان پرەزيدەنتى.
سوڭىندا نۇرسۇلتان نازاربايەۆ قارۋلى كۇشتەردى دامىتۋعا نازار اۋدارۋ ءاربىر مەملەكەتتىڭ پارىزى ەكەنىن اتاپ ءوتتى جانە مينيسترلىكتىڭ بۇكىل اسكەري قۇرامىنىڭ قىزمەتىنە تابىس تىلەدى.
پىكىر قالدىرۋ