قازاقستان سەناتىنىڭ ءتوراعاسى قاسىم-جومارت توقايەۆ وبسە پارلامەنتتىك اسسامبلەياسىنىڭ ۆەنادا وتكەن قىسقى سەسسياسىنىڭ اشىلۋىندا ۇيىمنىڭ قولدانىپ وتىرعان شەكتەۋ شارالارىنا كوڭىلى تولمايتىنىن ايتتى، - دەپ حابارلايدى «قامشى» پورتالى 24.kz– كە سىلتەمە جاساپ.
ەۋروپا ەلدەرى باسقا ەلدەردىڭ پارلامەنتشىلەرىنە قاتىستى قولدانىپ وتىرعان شەكتەۋلەرگە نارازىلىق بىلدىرگەن ق. توقايەۆ ۇيىمنىڭ ەڭ الدىمەن مەملەكەتتەر اراسىندا ءوزارا سەنىم قالىپتاستىرۋعا، ورتاق ساياسي جوبالار شەڭبەرىندە جۇمىس ىستەۋگە مۇرىندىق بولۋى كەرەكتىگىن ايتتى.
«ءبىز فورۋم جۇمىستارىنا پارلامەنت دەپۋتاتتارىنىڭ، اسىرەسە ولاردىڭ سپيكەرلەرىنىڭ قاتىسۋىنا ۆيزالىق شەكتەۋلەر ارقىلى توسقاۋىل قويۋدى دۇرىس دەپ سانامايمىز. ءححى عاسىر ساياساتىندا سانكسيالارعا ورىن جوق. ويتكەنى، ونداي سانكسيالار الەمدىك ەكونوميكانى شاتقاياقتاتىپ جىبەرەدى. سانكسيالار قولدانۋ – بىرىككەن ۇلتتار ۇيىمىنىڭ جۇمىسى جانە ونداي سانكسيالار ەڭ سوڭعى شارا رەتىندە قولدانىلۋى كەرەك»، - دەپتى ق. توقايەۆ مىرزا.
قازاق پارلامەنتشىسىنىڭ ايتقانىن رەسەي دۋماسىنىڭ كوميتەت ءتوراعاسى لەونيد سلۋسكيي توقايەۆتىڭ بۇل مالىمدەمەسىن قولداپ، «توقايەۆ قازاق ساياساتكەرىنە ءتان ەمەس شۇعىل مالىمدەمە جاسادى» دەگەن. سونداي-اق، ول ق. توقايەۆتى «ەۋروپالىق ماسشتابتان دا اسىپ تۇسەتىن ءىرى ساياساتكەر» دەپ باعالاعان.
وسى ل. سلۋسكيي وتكەن جىلدىڭ قاراشا ايىندا ەۋرازيالىق ەكونوميكالىق وداق ەلدەرىنىڭ ورتاق ۆاليۋتاسى ازىرلەنىپ جاتىر دەگەن مالىمدەمە جاساپ، ءبىراز شۋ تۋعىزعان ەدى.
وبسە پارلامەنتتىڭ اسسامبلەياسىنىڭ قىسقى سەسسياسى 25 اقپاندا اۆستريا استاناسىندا اشىلعان بولاتىن. وعان 50 ەلدىڭ پارلامەنت وكىلدەرى قاتىسىپ، ەكى كۇن بويى الەمدىك ماڭىزى بار ماسەلەلەردى تالقىلاۋدا.
پىكىر قالدىرۋ