فەيسبۋك الەۋمەتتىك جەلىسىندە ءالي احمات دەگەن اتپەن اشىلعان اككاۋنت يەسى گەورگيي لەنتاسىن تاعىپ تۇسكەن سۋرەتىن جاريالاپ، ول جەلى پايدالانۋشىلاردىڭ نارازىلىعىن تۋعىزدى، - دەپ حابارلايدى «قامشى» پورتالى.
رەسەيشىل سەپاراتيستەردىڭ سيمۆولى «گەورگيي لەنتاسىن» تاققان ازامات اناۋ-مىناۋ ەمەس پولكوۆنيك شەنىندەگى اسكەري ەكەن. لەنتانى دا جازدىق ۇلگىدەگى اسكەري جەيدەنىڭ كەۋدەسىنە تاعىپ العان.
اككاۋنت يەسى جەلى قولدانۋشىلارىنىڭ ەسكەرتپەلەرى مەن جات پيعىلدى ناسيحاتتاۋشىلاردىڭ سيمۆولىن الىپ تاستاۋ تۋرالى وتىنىشتەرىنە قۇلاق اسپاي، وزدەرىنە تاپ بەرگەن. وسىعان بايلانىستى ساكەن بايكەنوۆ ەسىمدى فەيسبۋك قولدانۋشىسى باستاعان ءبىر توپ بەلسەندى دابىل قاعىپ، ەلىمىزدەگى قارۋلى قۇرىلىمداردىڭ بارلىعىنا اتالعان اسكەري قىزمەتشىنىڭ ورەسكە ارەكەتى تۋرالى حات جولداعان. ازىرگە ساپاربەكتىڭ سۇراۋىنا قورعانىس مينيسترلىگى عانا قۇلاق اسىپ، رەسمي جاۋاپ قايتارعان. مينيسترلىك الەۋمەتتىك جەلى ارقىلى اتالعان ازاماتتىڭ تولىق ءاتى-جونىن جاريالاپ، ونىڭ قورعانىس مينيسترلىگى بولىنىستەرىنىڭ اسكەري قىزمەتشىسى ەمەستىگىن، ق ر ۇقك-گە قاراستى شەكارا قىزمەتىنىڭ وفيسەرى ەكەندىگىن ايتقان. جەلى قولدانۋشىلارىنىڭ بۇل شاعىمى دا گەورگيي لەنتاسىن تاققان وفيسەردىڭ شامىنا ءتيىپ، جەلى ارقىلى ءبىراز بالاعات سوزدەر ايتقان.
اتالعان كيكىلجىڭنەن سوڭ پولكوۆنيك اسكەري شەنىندەگى ءالجان احماتۋللين ەسىمدى (ق ر قم اسكەري قىزمەتشىنىڭ ءاتى-جونى وسىنداي دەپ وتىر – رەد.) اسكەري قىزمەتشى ءالي احمات دەپ اتالاتىن اككاۋنتىنداعى مالىمەتتەردىڭ ءبىرازىن، ونىڭ ىشىندە اتىشۋلى سۋرەتىن دە ءوشىرىپ تاستاعان. سوعان قاراعاندا، رەسەي تاريحىن «جاقسى بىلەتىن» پولكوۆنيكپەن ۇقك اسكەري قارسى بارلاۋ قۇرىلىمدارىنىڭ قىزمەتكەرلەرى «اڭگىمەلەسۋ» جۇرگىزگەن سەكىلدى.
ال، جەلى قولدانۋشىلارى سيمۆول سەرگەلدەڭىنە سەبەپ بولعان پولكوۆنيكتىڭ ءىسىن اياقسىز قالدىرمايتىنىن، ءتيىستى ورىندارعا ءالى دە شاعىمداناتىندارىن ايتىپ وتىر.
پىكىر قالدىرۋ