جالپىۇلتتىق سوسيال-دەموكراتيالىق پارتيا جەتەكشىسى جارماحان تۇياقباي پارتيانىڭ الداعى سايلاۋعا بويكوت جاريالاۋى مۇمكىن ەكەنىن مالىمدەدى، - دەپ حابارلايدى «قامشى» پورتالى informburo.kz-كە سىلتەمە جاساپ.

«ءبىز بارلىق نۇسقالاردى قاراستىرىپ جاتىرمىز. ازىرگە ناقتى شەشىم قابىلدامادىق. تەك ويلانىپ جاتىرمىز»، - دەگەن جارماحان تۇياقباي.

پارتيانىڭ الماتىلىق فيليالىنداعىلار دا مۇنداي شەشىمنىڭ كۇن تارتىبىندە جوق ەمەستىگىن ايتقان.

«ءقازىر بويكوت جاريالاۋ مۇمكىندىگىن تالقىلاۋدامىز. بۇعان دەيىن ءبىزدىڭ سايتتا بيلىك تاراپىنان سايلاۋدىڭ ءادىل دە جاريا وتۋىنە مۇمكىندىك بەرمەيتىن ادىلەتسىز قادامدار جاسالىپ وتىرعانى جاريالانعان بولاتىن. پارتيانىڭ كەيبىر مۇشەلەرى سايلاۋ الدى دودادان شىعۋدى، بويكوت جاريالاپ، سول باعىتتا ۇگىت جۇرگىزۋدى ۇسىنۋدا. ياعني، ءالى تالقىلاۋ ۇستىندەمىز. ءبىز سەزد كەزىندە-اق، بويكوت جاريالاۋ مۇمكىندىگىمىزدى ايتقان بولاتىنبىز. سول ءسات كەلگەن سياقتى. ءقازىر كونفەرەنسيا وتكىزۋ تۋرالى باستاما كوتەرىلدى. بۇگىن-ەرتەڭ وڭىرلەردەگى وكىلدەر، تاعى باسقا وكىلدەرمەن وسى ماسەلەنى تالقىلايمىز»، - دەگەن جسدپ الماتى فيليالىنىڭ جەتەكشىسى تازابەك سامبەتباي.

ەستەرىڭىزگە سالساق، جسدپ پارتيالىق ءتىزىمىن ورتالىق سايلاۋ كوميسسياسىنا 7 اقپاندا ۇسىنعان بولاتىن. پارتيالىق ءتىزىمدى جارماحان تۇياقباي، ايدار الىبايەۆ، پەتر سۆويك، بالتاش تۇرسىمبايەۆ، زاۋرەش باتتالوۆا سىندى ساياساتكەرلەر باستاپ تۇر.

بۇعان دەيىن، پارتيا مۇشەلەرى ساياساتكەر پ. سۆويكتى جسدپ قاتارىنان شىعارۋ تۋرالى باستاما كوتەرگەن ەدى.