جىلداعىداي بيىلعى كوكتەم دە حالىققا وڭاي سوقپايتىن سەكىلدى. بىلتىرعىداي بيىل دا ءبىرشاما ەلدى مەكەن قار سۋىنىڭ زاردابىن تارتۋى مۇمكىن.  مۇنى رەسمي بيلىك تە مويىنداپ وتىر.

ەسكەرتۋ ماقساتىندا ايتتى ما، جوق جاعداي ۋشىعىپ كەتىپ جاتسا، وسى باستان باسىمىزدى اراشالاپ الايىق دەدى مە توتەنشە جاعدايلار كوميتەتىنىڭ باسشىسى ۆلاديمير بەككەر كوكتەمگى سۋ تاسقىنىنا بولجام جاساپتى.

«سۋ الۋى مۇمكىن ايماقتاردى انىقتادىق. كوكتەمگى سۋ تاسقىنى كەزىندە 807 ەلدى مەكەندى سۋ باسۋ ءقاۋپى بارىن حابارلايمىز. بۇل بۇكىل رەسپۋبليكا بويىنشا. ول ەلدى مەكەندەردە بارلىعى 1 ميلليون 250 مىڭ ادام تۇرادى. وسىعان بايلانىستى ءبىز ءاربىر ەلدى مەكەنگە، حالىقتىڭ ناقتى سانىنا قاراي كوشىرۋ پۋنكتەرىن بەلگىلەپ وتىرمىز. بارلىعى سىزىلىپ، جازىلىپ قويدى. بارلىعى دايىن. اكىمدىكتەر دە مۇنىڭ بارلىعىن پىسىقتادى. بىرنەشە رەت كوماندالىق-شتابتىق جاتتىعۋلار وتكىزىلدى»، - دەيدى ۆ. بەككەر مىرزا.

بۇعان دەيىن دە بەككەر مىرزا سۋ الۋ ءقاۋپى تۋرالى مالىمدەگەن بولاتىن. اتاپ ايتقاندا، ول سۋ قويمالارىنان كەلەتىن ءقاۋىپتىڭ جوعارىلىعىن ەسكەرتكەن. ءقازىر تجك-نىڭ ەسەپتەۋىنشە 48 گيدروتەحنيكالىق نىسان يەسىز جاتقان كورىنەدى. قاراۋسىز جاتقان سۋ قويمالارىنان باسقا دامبالاردىڭ دا جارتىسىنا جۋىعى جوندەۋدى قاجەت ەتەتىن كورىنەدى. ءبىر قورقىنىشتىسى، ول ءقاۋىپتى دامبالار الگى سۋ استىندا قالۋى مۇمكىن دەلىنگەن قار قالىڭ تۇسكەن ايماقتاردا ورنالاسقان.

توتەنشە جاعدايلىقتاردىڭ بولجامىن وزەن، سۋلارعا جاۋاپتى اۋىلشارۋاشىلىعى مينيسترلىگىنىڭ ءتيىستى كوميتەتى دە راستاپ وتىر.

ەستەرىڭىزگە سالساق، بىلتىرعى كوكتەمدە دە اقمولا، قاراعاندى، قوستاناي، شىعىس قازاقستان، سولتۇستىك قازاقستان، پاۆلودار وبلىستارىندا قار سۋىنىڭ ەرەكشە مول جينالۋىنان، بىرنەشە ەلدى مەكەن مەن جولدار سۋ استىندا قالعان بولاتىن. توتەنشە جاعدايلار جونىندەگڭ ۆەدومستۆو سول كەزدە سۋ العان ايماقتاردا 2417 ءۇيدىڭ سۋ استىندا قالعانىن حابارلاعان بولاتىن. سولتۇستىكتەگى وبلىستاردىڭ باسشىلارى بيىلعى جىلى جاعدايدىڭ بىلتىرعىدان دا كۇردەلى بولاتىنىن ايتىپ، دايىندىق جۇمىستارىنداعى كەمشىلىكتەردى دە مويىنداعان بولاتىن.

وسى ماقساتتا بۇگىندە ءىىم قۇرامىنداعى توتەنشە جاعدايلار جونىندەگى كوميتەت جانىنان جەدەل توپ قۇرىلعانى ايتىلۋدا. كوميتەت قۇتقارۋ جۇمىستارىنا قاتىساتىن 200 مىڭ قىزمەتشى مەن، 1000-نان استام ارنايى تەحنيكاسىن ازىرلەپ قويىپتى. ونداعىلار ءتىپتى قۇتقارۋ جۇمىستارىنا 20 شاقتى تىكۇشاق، 200-دەن استام موتورلى قايىقتار دا جۇمىلدىرىلاتىنىن ايتۋدا. ماماندار بيىل قاردىڭ ەرۋى مەن سۋدىڭ تاسۋى ءساۋىر ايىندا باستالادى دەپ وتىر...

جومارت ابدوللا ۇلى