اكتەر، تەلەجۇرگىزۋشى تاۋەكەل ءمۇسىلىمنىڭ شاڭىراق كوتەرگەن «تويىنىڭ» قادىرمەندى قوناعى بولىپ قايتتىق. ناقتىراق ايتساق...

31-ارنانىڭ ۇيىمداستىرۋىمەن «كەلىندەر بايگەسى» اتتى رەاليتي شوۋدىڭ باسپا ءسوز كونفەرەنسياسى بولىپ ءوتتى. كونفەرەنسيا ءال-فارابي داڭعىلىن بويلاي جاتقان «ميراس» سالتانات سارايىندا توي ۇلگىسىندە بولدى. كونفەرەنسيا جوبا ەرەكشەلىگىنە بايلانىستى توي سالتاناتىمەن باستالدى. داستۇرگە ساي «جار-جار» ايتىلىپ، «تويدى» باسقارىپ جۇرگەن اسابا جاس جۇبايلاردى ورتاعا شاقىردى. جاڭا تۇسكەن كەلىننىڭ بەتى اشىلىپ، قايىن جۇرتىمەن تانىسىپ العان سوڭ جاس جۇبايلار توي تورىنە جايعاستى. كەشتىڭ نەگىزگى كەيىپكەرلەرى: كۇيەۋ جىگىت – اكتەر، تەلەجۇرگىزۋشى تاۋەكەل ءمۇسىلىم، قالىڭدىق – مودەل اسىلوۆا  كاميلا اتتى بويجەتكەن بولاتىن. تالاي ارۋىمىزدىڭ جۇرەگىن جاۋلاي بىلگەن تاۋەكەل بۇل جاي عانا قويىلىم، ءالى كۇنگە دەيىن باسىنىڭ بوس ەكەكىن ايتىپ ءوتتى.

جيىن بارىسىندا «كەلىندەر بايگەسى» جوباسىنا بايلانىستى كوپتەگەن سۇراقتار قويىلىپ، تەيىسىنشە جاۋاپتارىن الىپ جاتتى.

جوبا 31-ارنانىڭ ۇستانعان ماقساتىنا سايكەس (كورسەتىلەتىن باعدارلامالاردىڭ بارلىعى وتباسىمەن بىرگە كورۋگە ۇسىنىلادى) كورەرمەنگە كوتەرىڭكى كوڭىل كۇي سىيلاۋ، قازاقتىڭ ءسالت-داستۇرىن جەتە ءتۇسىندىرۋ، «تويدىڭ بولعانىنان بولادىسى قىزىق» دەمەكشى تويدا بولاتىن ءتۇرلى قىزىقتى وقيعالاردى حالىققا بوياماسىز ۇسىنۋ ماقساتىندا جاسالىپ وتىر.

باعدات قوجاحمەتوۆ، 31-ارنا ديرەكتورى:

قازاق حالقى تويشىل ەكەنىن بىلەمىز. قانداي داعدارىس بولماسىن، ءتۇرلى كەدەرگىلەرگە قاراماستان توي جاساۋدان باس تارتپايدى. سوندىقتان، بۇل جوبا حالىق اراسىندا جاقسى قابىلدانادى دەپ ويلايمىن.

اسەل تويانوۆا، جوبا ۇيىمداستىرۋشىسى:

بۇل رەاليتي شوۋ قازاقتىڭ ومىرىندە بولىپ جاتقان كۇندەلىكتى جاعدايدى جايىپ سالادى. قاتىسۋشى كەلىندەر بىر-بىرلەرىنىڭ تويلارىنىڭ قادىرمەندى قوناعى بولادى. جوبا اس ءمازىرى، زالدىڭ بەزەندىرىلۋى، قىزىقتى ويىندار، قالىڭدىق بەينەسى دەگەن 4 كەزەڭنەن تۇرادى.

اتالعان كەزەڭدەر بويىنشا كەلىندەر بىر-بىرىنە باعا بەرەدى، سول ارقىلى جەڭىمپاز انىقتالادى. جەڭگەن جۇپ بال ايى ساياحاتىنا جولداما الادى. ءبىر قىزىعى جوبا باستالماس بۇرىن انكەتا جۇرگىزىلگەن، ەڭ كوپ ۇمىتكەرلەر شىمكەنت، تاراز، الماتى قالالارىنان ب ا ق سىناعان.

وسى ورايدا «كۇيەۋ جىگىت» تاۋەكەل ءمۇسىلىم دە باعدارلاماعا قاتىستى سۇراقتارعا جاۋاپ بەرە وتىرىپ، بولاشاق قالىڭدىعى تۋرالى دا ويلارىمەن ءبولىستى.

«بولاشاق جارىمنىڭ قازاق قىزى بولاتىنىن ناقتى ايتا الامىن.قاراپايىم، اقجارقىن، تاربيەلى، بويىندا ىزگى قاسيەتتەرى مول يناباتتى قىز بولسا دەيمىن»، - دەيدى تاۋەكەل ءمۇسىلىم.

دايىنداعان: ايجان جۇمابەكوۆا