سايلاۋ وتكەن سوڭ، ماجىلىسكە جاڭادان سايلانعان دەپۋتاتتار استاناداعى بەس جۇلدىزدى قوناق ۇيلەرگە جايعاساتىن كورىنەدى. ق ر پارلامەنتىنىڭ شارۋاشىلىق باسقارماسى دەپۋتاتتارعا ارنالعان مەملەكەتتىك تۇرعىن ءۇي قورىن «جاڭا تۇرعىندارعا» ۇلەستىرگەنگە دەيىن وسىنداي ۋاقىتشا قادامعا بارماق. اتالعان باسقارمانىڭ قوناق ءۇي قىزمەتىنە اشىق مەملەكەتتىك ساتىپ الۋ بايقاۋىن جاريالاعانىن ratel.kz سايتى جازىپ وتىر.

جالپى قۇنى 169 713 392،86 تەڭگە بولاتىن كونكۋرستىڭ جەڭىمپازى دا بەلگىلى بولىپتى.

«حاتتامادا جازىلعانداي «سولاكس» كومپانياسى كونكۋرس جەڭىمپاز اتالىپ وتىر»، - دەگەن پارلامەنتىنىڭ شارباس (شارۋاشىلىق باسقارماسى) زاڭ قىزمەتى  جانە مەملەكەتتىك ساتىپ الۋلار باسقارماسىنىڭ باستىعى  ءباقادىل قونقاشوۆ.

جەڭىمپاز كومپانيا «حالىق قالاۋلىلارىنا» 3،5 پايىز جەڭىلدىك ۇسىنىپ، سول ارقىلى كونكۋرستى ۇتىپ العان كورىنەدى.

«سۋ جاڭا دەپۋتاتتار» سايلاۋدان سوڭ «سولاكس» كومپانياسىنىڭ قاراماعىنداعى Soluxe Astana (Beijing Palace) قوناق ۇيىنە جايعاسپاق.

قوناق ءۇي باسشىلىعى مەيمانحانالارىنىڭ جوعارى تالاپتارعا ساي ەكەنىن ايتقان.

«ءبىز دەمالۋشىلاردىڭ جانى دا، ءتانى دە راحات تاباتىن جاعدايلار جاسايمىز. سپا ورتالىقتا دەمالىپ، جۇڭگو اسحاناسىنان ءدام تاتۋ مۇمكىندىگىن ۇسىنامىز. ءبىزدىڭ قوناق ءۇيدىڭ 23-قاباتىندا ورنالاسقان، اينالىپ تۇراتىن مەيرامحانامىزدان دەپۋتاتتار بۇكىل استانانى باقىلاپ وتىرىپ، اس ءىشۋ مۇمكىندىگىنە يە بولادى. قىتايلىق اسپازدار قوناق ءتۇي كليەنتتەرىنە جۇڭگو اسحاناسىنىڭ بارلىق ءتاتتى-دامدىسىن ۇسىنادى»، - دەپتى ونداعىلار.

ەل اراسىندا «پەكين پالاس» اتالىپ كەتكەن قوناق ءۇي نومىرلەرى دىبىس وتكىزبەيتىن قاسيەتتەرىمەن دە تانىمال ەكەندىگى ايتىلۋدا.

سونىمەن، دەپۋتات بولۋ باقىتى بۇيىرعان قالاۋلىلار اتالعان قوناق ءۇيدىڭ ءارقايسىسىنىڭ اۋدانى 35 شارشى مەتردەن باستالاتىن 107 نومىرىنە جايعاسادى. ratel.kz وسىلايشا قوناق ءۇيدى تولىقتاي دەپۋتاتتار جايلايتىنىن جازۋدا. باسىلىمنىڭ حابارلاۋىنشا مۇنداعى نومىرلەردىڭ باعاسى تاۋلىگىنە 118 800 تەڭگەدەن باستالاتىن كورىنەدى.

اتالعان قوناق ءۇيدىڭ جۇڭگو ۇلتتىق مۇناي كومپانياسىنىڭ (CNPC) «حۋا يوۋ» ەنشىلەس كومپانياسىنا تيەسىلى ەكەنىن ايتا كەتۋ كەرەك.

ازىرلەگەن: دارحان مۇقانتەگى