كاسىپقوي بوكسشى قانات يسلام ريو وليمپياداسىنا قاتىسۋ تۋرالى ويىن ءبىلدىردى، - دەپ حابارلايدى «قامشى» پورتالى oishogyr.kz – كە سىلتەمە جاساپ.

بوكسشى جۋرناليست بەرىك سۇلتاننىڭ سۇراعىنا ءقازىر اقش-تا جاتتىعۋ جاساپ جاتقانىن، ءساۋىر ايىندا كەزەكتى كەزدەسۋى وتەتىنىن ايتقان.

«ەلدىڭ ىقىلاسىنا، قولداۋىنا راحمەت. مەنى ىزدەيتىن قازاعىمنىڭ بارىنا شۇكىر. ەلدىڭ ىقىلاسى جەڭىسكە جەتۋىمە سەنىم ۇيالاتىپ، سەرپىن بەرەدى. ءقازىر مەن اقش-تا كەلەسى جاتتىعۋىما دايىندالىپ جاتىرمىن. بۇيىرتسا جەكپە-جەك كەلەسى ايدىڭ سەگىزىنە دەپ جوسپارلانۋدا. ارينە مەن ءۇشىن وليمپيادانىڭ ورنى بولەك. اقش-تا دا كوك تۋدى جەلبىرەتۋ ءۇشىن ءجۇرمىن عوي. ءبىراق وليمپيادا ويىندارىندا ءانۇراندى ويناتۋ ول بولەك نارسە. ول بولەك قۋانىش. ءقازىر مەنىڭ سالماعىمدا دانيار ەلەۋسىنوۆ، جانىبەك ءالىمحان ۇلى ىنىلەرىم ونەر كورسەتىپ ءجۇر. ەكەۋى دە جاقسى جىگىتتەر. ولار بوكس الەمىنىڭ جارىق جۇلدىزىنا اينالاتىنىنا سەنەمىن. تىلەكشىمىن. شىنىمدى ايتسام، سول ەكى ءىنىمنىڭ جولىن كەسكىم كەلمەيدى. ارينە، ماڭدايعا جازعانى بولادى. ەگەر، قانات وليمپياداعا ەلدىڭ اتىنان سەن بارۋىڭ كەرەك دەسە، مەن دايىنمىن. ءبارىن تاستاپ بارۋعا ءازىرمىن. بيىلعى دودا وتە تارتىستى بولماق، وليمپيادادا ونەر كورسەتەتىن باۋىرلارىما تەك ساتتىلىك تىلەيمىن. كوك تۋدى جەلبىرەتىپ، ەل قورجىنىنا كوپ التىن سالادى دەپ سەنەمىن»، - دەيدى قانات يسلام.

ەستەرىڭىزگە سالساق، اۋەسقوي بوكس قاۋىمداستىعى (ءاىۆا) كاسىپقوي بوكسشىلاردىڭ دا ريودا وتەتىن وليمپياداعا قاتىسۋىنا رۇقسات بەرگەن بولاتىن.