قازاقستاندا شەنەۋنىكتەر مەن پوليسيا قىزمەتكەرلەرىنە سمارتفون پايدالانۋعا تىيىم سالىندى، - دەپ حابارلايدى «قامشى» پورتالى.

ىشكى ىستەر ءمينيسترى قالمۇحانبەت قاسىموۆ مۇنداي شەكتەۋدى پوليسيا كۇزەتەتىن ورگانداردىڭ شەشىمى دەپ تۇسىندىرگەن.

ءبىرقاتار اقپارات قۇرالدارى بۇل شەكتەۋ استانا قالاسىندا جاۋىزدىقپەن ولتىرىلگەن ستۋدەنت ەراسىل اۋباكىروۆتىڭ ءمايىتى تۇسىرىلگەن فوتولاردى پوليسيا قىزمەتكەرلەرى الەۋمەتتىك جەلىلەرگە جاريالاپ جىبەۋىمەن بايلانىستىرعان بولاتىن.

«مۇنىڭ اتالعان وقيعاعا قاتىسى جوق. بۇل ءبىز كۇزەتەتىن مەكەمەلەردىڭ شەشىمى. ال، انا جاعداي (ە. اۋباكىروۆتىڭ سۋرەتىنىڭ تاراپ كەتۋى – رەد.) شىنىمەن جاقسى نارسە ەمەس. ءبىزدىڭ جەدەل قىزمەتكەرلەر قىزمەتتە قولدانىلمايتىن قۇرالداردى پايدالانعان. ولاردى جازالادىق»، - دەگەن ق. قاسىموۆ ءوزى قاراپايىم «نوكيا 8800» ماركالى قالتا تەلەفونىن ۇستايتىنىن ايتقان.

الەۋمەتتىك جەلى قولدانۋشىلارى مەملەكەتتىك مەكەمەلەر مەن ءتۇرلى كاسىپورىندارعا ورتالىق بيلىك ورگاندارىنان سمارتفونداردى پايدالانۋعا شەكتەۋ قويۋ تۋرالى قىزمەتتىك حاتتار ءتۇسىپ جاتقانىن ايتۋدا.

رەجيمدىك مەكەمەلەر مەن قۇپيا قۇجاتتارمەن جۇمىس ىستەيتىن قىزمەتكەرلەردىڭ اقپارات تاراتۋ قۇرالدارىن پايدالانۋىنا شەكتەۋ قوياتىن نۇسقاۋلىقتار مەن ەرەجەلەر بۇرىننان بار. ال، كەيبىر قىزمەتكەرلەر مەن باسشىلاردىڭ سالعىرت-سالاقتىعى ءۇشىن زامانعا ساي بايلانىس قۇرالدارىنا جاپپاي تىيىم سالۋ ادام قۇقىن شەكتەۋ بولىپ سانالماي ما؟ ول جاعىن اشىپ ايتقان ەشكىم جوق.