بيزنەسمەن قۋانىش شونباي "16 قىز" ءفيلمىن قازاق تىلىندە پرايم-تايمدا كورسەتۋ ءۇشىن كينوتەاترلاردىڭ ءبىرىنىڭ زالىن ساتىپ الدى، - دەپ حابارلايدى «قامشى» پورتالى Tengrinews.kz – كە سىلتەمە جاساپ.

كاسىپكەردىڭ ايتۋىنشا، بۇل اكسياسىمەن ول قازاق تىلىندەگى فيلمدەردى پرايم-تايمداردا كورسەتىلمەيتىندىگى تۋراسىنداعى ماسەلەگە نازار اۋدارعىسى كەلىپتى. "قوعامداستىق پەن ءبىزدىڭ بلوگەرلەر پروكاتشىلاردىڭ ءبىزدىڭ فيلمدەردى شەتتەتەتىنىن، ولاردى تاڭعى ساعات 10-عا قوياتىنىن ايتىپ، شاعىمدانىپ جاتىر. سوسىن مەن كينوتەاترلارعا ادام كوپ كەلەتىن كەشكى ۋاقىتتا زالدى ساتىپ الۋدى ۇسىندىم. قازاق كينوسىنىڭ قىزىق ەكەنىن جانە جاقسى پروكات جيناي الاتىنىن كورسەتكىمىز كەلدى. ازاماتتىق پوزيسيامدى كورسەتكىم كەلدى"، - دەيدى قۋانىش شونباي. 

ول كينوداعى ءتىل ماسەلەسىن، وتاندىق كينو ماسەلەسىن كەشەندى تۇردە شەشۋ كەرەك دەپ ەسەپتەيدى. "(...)  مۇنىمەن مەملەكەتتىڭ اينالىسۋى كەرەكتىگى بەلگىلى. ءبىراق ءبىز بەلسەندى ازاماتتار كۇتپەۋىمىز كەرەك. كەننەدي ايتپاقشى، بىزگە وتان نە بەرەدى دەپ ەمەس، ءبىز ەلگە نە بەرە الامىز دەپ ويلاۋىمىز كەرەك. بىرنەشە وي، جوبا بار. ورتاق كۇشىمىزدىڭ ارقاسىندا قازاق ءتىلىن، مادەنيەتىمىزدى، كينومىزدى دامىتا الامىز دەپ ويلايمىن"، - دەدى ق. شونباي. 

رەجيسسەر قاناعات ءمۇستافيننىڭ قازاقستاندىق كومەدياسى 17 ناۋرىزدا 19.30-دا كورسەتىلەدى. Chaplin كينوتەاترىنىڭ باسشىلىعى 154 ادامعا ارنالعان ۇلكەن زالىن ۇسىندى. كىرۋ تەگىن، تەك وسى جازباعا پىكىر رەتىندە كينوعا باراتىنىن جازۋ كەرەك ەكەن. "كىرۋ تەگىن، ءبىراق قالاساڭىزدار، بيلەت قۇنىنىڭ اقشاسىن بالالار باقشاسىنىڭ بالالارىنا پوپكورندار مەن سۋسىندار الىپ بەرۋلەرىڭىزگە بولادى (40 بالا)"، - دەدى ول.