ق ر قورعانىس مينيسترلىگى مەن ۇقك قىزمەتكەرلەرىنە قاتىستى وتكەن جىلى جەمقورلىق سيپاتتاعى 50 شاقتى قىلمىستىق ءىس قوزعالعان، - دەپ حابارلايدى «قامشى» پورتالى Kazpravda.kz – كە سىلتەمە جاساپ.

بۇل تۋرالى قورعانىس مينيسترلىگىندە جەمقورلىققا قارسى ءىس قيمىل جونىندەگى ۇلتتىق بيۋرو باستاماسىمەن وتكەن سەلەكتورلىق جيىندا بيۋرو ءتوراعاسىنىڭ ورىنباسارى اليك شپەكبايەۆ مالىمدەدى.

«وتكەن جىلى قارۋلى كۇشتەر، ۇقك شەكارا قىزمەتى جانە ءىىم ۇلتتىق ۇلانىنىڭ لاۋازىمدى تۇلعالارىنا قاتىستى 49 جەمقورلىق قىلمىس تىركەلدى. ولاردىڭ 38ء-ى، ياعني 78 پايىزى اۋىر جانە اسا اۋىر ساناتتاعى قىلمىستار. 44 تۇلعاعا قاتىستى تەرگەۋ جۇرگىزىلدى»، - دەيدى اسكەريلەرمەن جەمقورلىقپەن كۇرەس جايىن ءسوز ەتكەن ا. شپەكبايەۆ.

جەمقورلىقپەن كۇرەسكەر شەنەۋنىكتىڭ ايتۋىنشا، جەمقورلىق قىلمىستار كوبىنەسە مەملەكەتتىك ساتىپ الۋلار سالاسىندا، قورعانىس ىستەرى جونىندەگى باسقارمالار (اسكەري كوميسسارياتتار) مەن ءبىلىم بەرۋ مەكەمەلەرىندە (اسكەري مەكتەپتەر، ت.ب.) ءجيى ورىن الاتىن كورىنەدى.

الايدا، ا. شپەكبايەۆ مىرزا قورعانىس مينيسترلىگىندە الدىن الۋ شارالارىنىڭ ناتيجە بەرىپ وتىرعانىن ايتقان. 2014 جىلمەن سالىستىرعاندا بىلتىر بۇل بۇل ۆەدومستۆودا جەمقورلىق قىلمىستار سانى 21 پايىزعا (34-تەن 27-گە) قىسقارعان.

«جالپى ەل بويىنشا جەمقورللىققا قارسى ارەكەتتەردىڭ ءوسۋ قارقىنى بايقالادى. مۇنى ازاماتتار مەن ساراپشىلار پىكىرى نەگىزىندە جاسالاتىن حالىقارالىق رەيتينگتەر راستاپ وتىر»، - دەيدى ا. شپەكبايەۆ.

اسكەريلەرگە جەمقورلىق قىلمىستىڭ قىر-سىرى تۋرالى تۇسىندىرگەن ا. شپەكبايەۆ بۇرىن ءىستى بولىپ قولعا تۇسكەن، كىناسىن مويىنداپ، وكىنگەن، تۇزەۋ مەكەمەلەرىندە جازاسىن وتەپ جاتقان اسكەري قىزمەتشىلەر تۋرالى بەينەروليكتەر مەن دەرەكتى فيلمدەر كورسەتتى.

جيىن بارىسىندا بيۋرو باسشىسىنىڭ ورىنباسارى جەمقورلىققا قارسى ءىس-قيمىل جونىندەگى ۇلتتىق بيۋرو اتالعان قىلمىسپەن اياۋسىز كۇرەسەتىنىن جانە جازادان قۇتىلۋدىڭ مۇمكىن ەمەستىگىنە نازار اۋدارتتى. جيىنعا قورعانىس مينيسترلىگىنەن باسقا، اسكەر تۇرلەرى مەن تەكتەرى باسقولباسشىلارىنىڭ، قولباسشىلارىنىڭ ورىنباسارلارى، وڭىرلىك گارنيزوندارداعى باسقا دا اسكەري بولىمدەر مەن قۇراما كومانديرلەرى قاتىسقان.

ازىرلەگەن: دارحان مۇقانتەگى