م.اۋەزوۆ اتىنداعى قازاق مەملەكەتتىك اكادەميالىق دراما تەاترى 4-6 ءساۋىر ارالىعىندا ورال قالاسىنا گوسترولدىك ساپارعا اتتانادى، - دەپ حابارلايدى «قامشى» پورتالى.
تەاترىمىزدىڭ ديرەكتورى، ق ر ەڭبەك سىڭىرگەن قايراتكەرى ەرلان ءبىلال باستاعان تەاتر ۇجىمى ق ر حالىق ءارتيسى، ورال ءوڭىرىنىڭ تۋماسى گۇلنار جاقىپوۆانىڭ قاتىسۋىمەن قويىلاتىن 3 سپەكتاكلدى باتىس قازاقستان وبلىستىق دراما تەاترىندا ساحنالاماقشى. اتاپ ايتقاندا، 4 ءساۋىر سەرىك اسىلبەك ۇلىنىڭ «يمپەرياداعى كەش» دراماسى، 5 ءساۋىر تۇنجەر جۇجەنوعلىنىڭ «كوشكىن» ءافساناسى (اۋد. و.قىيقىموۆ)، 6 ءساۋىر عاريفوللا ەسىمنىڭ «تاڭسۇلۋ» دراماسى. باستالۋى – 18:30. اتالعان سپەكتاكلدەردىڭ رەجيسسەرى – قازاقستاننىڭ ەڭبەك سىڭىرگەن قايراتكەرى الما كاكىشيەۆا.
«يمپەرياداعى كەش» – س.اسىلبەك ۇلىنىڭ بۇگىنگى كۇننىڭ شىندىعىن بۇكپەسىز بايانداعان شىعارماسى. 2013 جىلى اقتوبە قالاسىندا ت.احتانوۆتىڭ 90 جىلدىعىنا ارنالعان قازاقستان دراما تەاترلارىنىڭ ءححى رەسپۋبليكالىق فەستيۆالىندە «بۇگىنگى زامان تاقىرىبىن ءساتتى يگەرگەنى ءۇشىن» اتالىمىمەن ماراپاتتالىپ، لاۋرەات اتالعان قويىلىم ەكەنىن ەسكە سالا كەتكەن ءجون. سپەكتاكلدە ايدار ەسىمدى كاسىپكەر ارقىلى بيلىك پەن ءمانساپتىڭ، كوكالا قاعازدىڭ سوڭىنا ءتۇسىپ، بۇل ومىردەگى گۋمانيستىك قاسيەتتەردەن الشاقتاعان جانداردىڭ شىنايى بەت-بەينەسى اشىلادى. اۆتور س.اسىلبەك ۇلى: «مەن حالىق-اعارتۋ، ءبىلىم بەرۋ سالاسىندا ىستەيمىن. 2001 جىلدان بەرى ون ءتورت جىل بولدى، جوعارى وقۋ ورىندارى جۇيەسىندە قىزمەت ەتىپ جۇرگەنىمە. ءارتۇرلى قىزمەت ىستەدىم، اعا وقىتۋشى، دوسەنت، پروفەسسور بولدىم. ۋنيۆەرسيتەتتەگى ادامداردىڭ، ۇستازداردىڭ مىنەز-قۇلقىن، ادەت-سالتىن، ومىرلىك ۇستانىمدارىن ءبىراز بىلەتىندەي تاجىريبەم بار، سول نەگىزدە جازدىم»، – دەيدى.
ال، «تۇرىكتىڭ چەحوۆى» اتانىپ كەتكەن تۇنجەر جۇجەنوعلىنىڭ «كوشكىن» قويىلىمىندا اپاتتى ايماقتاعى اۋىل ادامدارىنىڭ ءومىرى سۋرەتتەلەدى. بۇل – جۇرتقا تونگەن اپات تۋرالى عانا ەمەس، ادام ساناسىنداعى ۇرەيدەن ارىلۋ قاجەتتىلىگىن كورسەتەتىن پەسا. ۇرەيلەنىپ – ۇندەمەۋ. دىبىس شىقسا، كوشكىن جۇرەدى دەگەن ۇرەيمەن جىلدىڭ توعىز ايىن ۇنسىزدىكپەن وتكىزگەن تاۋلى ايماقتاعى شاعىن قىستاقتا ءومىر سۇرەتىن ادامداردىڭ قورقىنىشى...
«تاڭسۇلۋ» – قازاقتىڭ قاسيەت دەگەن ءسوزىنىڭ ءبىر فورماسى» دەپ الما كاكىشيەۆا ايتقانداي، سۇلۋلىعىن نامىسى، ەلى، ۇرپاعىنىڭ اماندىعى ءۇشىن تارك ەتكەن، شامامەن تولە بي زامانىندا ءومىر سۇرگەن باتىر ايەلدىڭ ەرلىگى ع.ەسىمنىڭ شىعارماسى ارقىلى تاريح بەتىنە تۇسسە، ا.كاكىشيەۆانىڭ رەجيسسەرلىگىمەن قاراشاڭىراق ساحناسىندا قويىلىپ، سىنشىلاردىڭ جوعارى باعاسىنا يە بولدى جانە كورەرمەن قاۋىمنىڭ كوزايىمىنا اينالدى. وسى ورايدا، بۇرىنعى، قازىرگى زاماندى جانە بولاشاقتى توعىستىرعان ۆيدەوجوبا، گولوگرافيا قولدانۋعا بەيىمدىلىگى ارقاسىندا قازاق ساحناسىنا تىڭ سەنوگرافيالىق سەرپىلىس اكەلدى. جەتىگەن مەن دومبىرا وينايتىن دارىن يەسى، قازاق قىزدارىنىڭ قايتپاس قايسار رۋحىن، ءور مىنەزدىلىگىن جاڭعىرتقان تاڭسۇلۋ بەينەسىندە – تەاترىمىزدىڭ اكتريساسى اجارلىم باقىتجانوۆا. «ايەل زاتىنا سۇلۋلىق باقىتقا قوسا قاسىرەت اكەلەدى، بايبىشە، بالانىڭ جولى كۇنشىعىسقا دا، كۇنباتىسقا دا باستاپ تۇر. انىق-قانىعىن مەنىڭ قۇمالاقتارىم اشا الماي، قينالىستا وتىرمىن. بايقايمىن، بالاڭىز ءوزىنىڭ الداعى ءومىرىن وڭىندە كورىپ، بولجاعانعا ۇقسايدى. و، عاجاپ، مۇنداي دا بولادى ەكەن-اۋ!» دەگەن ۇلتىمىزدىڭ ۇمىتىلعان، تاريح قاتپارىنىڭ قۇپيا جادىندا ساقتالعان باقسىنىڭ سوزىنەن-اق، قويىلىمنىڭ بەت الار باعىتى اڭعارىلعانداي. وسىنداي جاۋاپكەرشىلىگى زور ءرولدى موينىنا العان گ.جاقىپوۆا قويىلىممەن بىتە قايناسىپ، ساباقتاسا ورىلگەندەي.
قۇرمەتتى ونەر سۇيەر قاۋىم، 90 جىلدىق تاريحى بار، قازاق تەاتر ونەرىنىڭ العاش ىرگە تاسى قالانىپ، شىمىلدىعى اشىلعان، كسرو جانە قازاقستاننىڭ حالىق ارتيستەرى، ق ر ەڭبەك سىڭىرگەن قايراتكەرلەرى ەڭبەك ەتەتىن ونەر ورداسىنىڭ ورال قالاسىنداعى باتىس قازاقستان وبلىستىق دراما تەاترىندا ساحنالاناتىن قويىلىمدارىن جىبەرىپ الماڭىزدار!
پىكىر قالدىرۋ