جۇما كۇنى قىرعىزستان مەن وزبەكستان شەكاراسىنداعى قىرعىزستاننىڭ جالال-اباد وبلىسى موعول الا بۇعى اۋدانىنداعى شەكارا ۋچاسكەسىنە وزبەكستان تاراپىنان ەكى بتر تەحنيكاسى مەن ەكى كاماز كولىگى قويىلعان. سونىمەن بىرگە، 40 شاقتى وزبەك جاۋىنگەرى دە قىرعىز جەرىنە باسىپ كىرگەن بولاتىن.  وزبەكستان تارابى ءبىر جاقتى شەشىممەن شەكاراداعى «مادەنيەت» باقىلاۋ-وتكىزۋ بەكەتىن دە جاۋىپ تاستاعان. ال، «دوستىق» اۆتوبەكەتىندە كولىك پەن ازاماتتاردىڭ وتۋىنە شەكتەۋ جاساعان. ول شەكتەۋ بويىنشا قىرعىز ازاماتتارىنىڭ وزبەكستاننان شىعۋىنا رۇقسات بەرىلىپ، وزبەكستانعا كىرۋىنە توسقاۋىل قويىلۋدا. الايدا، وزبەك ازاماتتارىنا مۇنداي شەكتەۋ قويىلماعان.

بۇگىن قىرعىزستان تاراپىنىڭ دا شەكاراعا قوسىمشا كۇش باعىتتاعانى بەلگىلى بولىپ وتىر. قىرعىزستاننىڭ مەملەكەتتىك شەكارا قىزمەتى وزبەكستانمەن شەكاراعا ساۋىتتى تەحنيكالارىن جىبەرگەن.

«قىرعىزستاننىڭ مەملەكەتتىك شەكارا قىزمەتى وزبەك تاراپىنىڭ ارەكەتتەرىنە بايلانىستى جالال اباد وبلىسى چالاسارت اقسي اۋدانىندا قاۋىپسىزدىكتى قامتاماسىز ەتۋ ءۇشىن شارا قابىلداپ وتىر: شەكارانىڭ اتالعان ۋچاسكەسىندە ءقازىر قىرعىزستان مەملەكەتتىك شەكارا قىزمەتىنەن ەكى بتر تەحنيكاسى مەن ارنايى جاساق ءبولىندى»، - دەلىنگە قىرعىزستاننىڭ مەملەكەتتىك شەكارا قىزمەتى تاراتقان حابارلامادا.

قىرعىزستان تاراپى سونداي-اق، اقپارات قۇرالدارىندا شەكارادا اتىس بولدى دەگەن حاباردىڭ شىندىققا جاناسپايتىنىن مالىمدەدى.

«18-20 ناۋرىز ارالىعىندا مەملەكەتتىك شەكارانىڭ اتالعان ۋچاسكەسىندە قارۋ قولدانۋ وقيعاسى بولعان جوق»، - دەلىنگەن حابارلامادا.

قىرعىز باق-تارى شەكاراداعى احۋال ارنايى قىزمەتتەردىڭ تولىق باقىلاۋىندا ەكەندىگىن جانە ەكى مەملەكەت وكىلدەرىنىڭ كەلىسسوزدەرى ءجۇرىپ جاتقانىن حابارلاۋدا. ول كەلىسسوزدە قىرعىز ەلى وزبەكستاننان اۋىر تەحنيكا مەن اسكەريلەردى شەكارا ۋچاسكەسىنەن الىپ كەتۋدى تالاپ ەتۋدە.

جەرگىلىكتى تۇرعىندار دا وزبەكستان تاراپىنىڭ بۇل ارەكەتىنە نارازىلىق بىلدىرۋدە.