قازاقستان رەسپۋبليكاسى پارلامەنتى ماجىلىسىنە سايلاۋدىڭ الدىن الا قورىتىندىلارى بويىنشا ءۇش ساياسي پارتيا ءوتتى، - دەپ حابارلايدى «قامشى» پورتالى.

بۇگىن ق ر پارلامەنتى ءماجىلىسى  سايلاۋىنىڭ الدىن الا قورىتىندىسىن جاريالاعان ق ر ورتالىق سايلاۋ كوميسسياسىنىڭ ءتوراعاسى قۋاندىق تۇرعانقۇلوۆ وسىلاي مالىمدەدى.

«20 ناۋرىز كۇنى ەلىمىزدە ۇلكەن ساياسي ناۋقان ءوز مارەسىنە جەتتى. قازىرگى ۋاقىتتا ورتالىق سايلاۋ كوميسسياسىنا كەلىپ تۇسكەن مالىمەتتەرگە سايكەس پارتيالىق تىزىمدەر بويىنشا سايلاناتىن قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارىن سايلاۋدا سايلاۋشىلار داۋىسى جاريا ەتىلەدى»، - دەدى ول.

سونىمەن سايلاۋدىڭ الدىن الا قورىتىندىسى بويىنشا:

«نۇر وتان» پارتياسى - 82،15؛

قازاقستان كوممۋنيستىك حالىق پارتياسى - 7،14؛

قازاقستاننىڭ «اق جول» دەموكراتيالىق پارتياسى - 7،18؛

«بىرلىك» ساياسي پارتياسى - 0،29؛

جالپىۇلتتىق سوسيال-دەموكراتيالىق پارتيا - 1،18؛

«اۋىل» حالىقتىق-دەموكراتيالىق پارتيوتتىق پارتياسى - 2 پايىز داۋىس جيناعان.

«وسىلايشا، پارلامەنت ماجىلىسىنە ءوز ۇمىتكەرلەرىن ۇسىنعان 6 ساياسي پارتيانىڭ ۇشەۋى سايلاۋ تۋرالى زاڭدا كورسەتىلگەن 7 پايىزدىق مەجەدەن ءوتتى. ولار: «نۇر وتان» پارتياسى، قازاقستاننىڭ «اق جول» دەموكراتيالىق پارتياسى مەن قازاقستان كوممۋنيستىك حالىق پارتياسى»»، - دەيدى وسك باسشىسى.
ق. تۇرعانقۇلوۆتىڭ ايتۋىنشا، ورتالىق سايلاۋ كوميسسياسى پارتيالىق تىزىمدەر بويىنشا سايلاناتىن ءماجىلىس دەپۋتاتتارىن سايلاۋدىڭ سوڭعى قورىتىندىلارىن اۋماقتىق سايلاۋ كوميسسيالارى حاتتامالارىنىڭ نەگىزىندە 2016 جىلعى 26 ناۋرىزدان كەشىكتىرمەي بەلگىلەۋى ءتيىس.

كەشە ەرىكتىلەر وتكىزگەن Exit poll ناتيجەلەرى جاريالانىپ، ول بويىنشا «نۇر وتان» پارتياسى – 82، قحكپ – 7،17، «اقجول» قدپ – 7،22، «بىرلىك» پارتياسى – 0،35، جسدپ – 1،21، «اۋىل» پارتياسى – 2،05 پايىز داۋىس جيناعاندىعى حابارلانعان ەدى.

ءسويتىپ، وسك تاراتقان رەسمي مالىمەتتەر دە Exit poll ناتيجەسىنەن الىسقا ۇزاي قويمادى.