Bek Air اۋە كومپانياسىنىڭ استانا اۋەجايىنا اپاتتى جاعدايدا قونعان "فوككەر-100" ۇشاعىنىڭ ەكىنشى پيلوتى ۆاديم سمەرەچانسكيي وقيعا جايلى باياندادى، - دەپ حابارلايدى «قامشى» پورتالى Tengrinews.kz – كە سىلتەمە جاساپ.

سمەرەچانسكيي قونۋ كەزىندە ۋايىمداۋعا دا ۋاقىتتىڭ بولماعانىن، ەموسيانىڭ ۇشاق جەرگە قونعاندا عانا تۋلاپ قويا بەرگەنىن ايتتى.

"ءبىز قونعالى جاتقان كەزدە ءشاسسيدىڭ اشىلماعانىن ەسكەرتەتىن دابىل قوسىلدى. سودان ءبىز ءشاسسيسىز قونۋعا بەل بۋدىق. (...) ءبىز ءار جارتى جىل سايىن دايىندىقتان وتەمىز، بەيستاندارت پروسەدۋرالاردى وتكەرەمىز، سوندىقتان ءبىز دايىن بولدىق. ءبىراق وقيعا شىن مانىندە ءوز ومىرىڭدە بولىپ جاتقاندا ءبارى باسقاشا. مەن مۇنداي جاعدايعا ءبىرىنشى رەت تاپ بولدىم. وزىمە كەلەتىن بولسام، وقيعا كەزىندە ۋايىمداۋعا ۋاقىتىم بولمادى، سەبەبى ۇشاق ۇشىپ بارا جاتتى، جىلدام شەشىم قابىلداۋعا تۋرا كەلدى. ۋايىم ۇشاق جەرگە قونعاندا باستالدى. ءبىراق بۇل ۋايىم بارلىعىنىڭ ءتىرى ءارى امان-ەسەن بولۋىنا قاتىستى قۋانىش بولدى"، - دەدى پيلوت.

ول بۇل اۋە كومپانياسىندا 2014 جىلدان بەرى جۇمىس ىستەيتىنىن، ازاماتتىق اۆياسيا اكادەمياسىن بىتىرگەن 2009 جىلدان باستاپ ۇشىپ جۇرگەنىن ايتتى. سمەرەچانسكييدىڭ ايتۋىنشا، ول اۆياسيانى كاسىپ ەتكەن جانۇيادا دۇنيەگە كەلگەن، ونىڭ اتاسى دىنمۇحامەد قونايەۆتىڭ جەكە پيلوتى بولعان ەكەن. 

"بىزدە جانۇيا ديناستياسى، اتام - ۇشقىش، اكەم پيلوت، مەن دە ءۇشىنشى ۇرپاقپىن. (...) بالا كەزىمدە اتاممەن بىرگە ۇشاتىنمىن، ءبىراق اكەممەن كوپ ۇشتىم، قاراپ، ۇيرەنىپ، اۆياسيالىق جانۇيادا ءوستىم، اڭگىمەمىز تەك ۇشاق جايىندا بولاتىن. ءبىرىنشى سىنىپتان باستاپ پيلوت بولۋدى ارماندادىم"، - دەدى ول.

وسىعان دەيىن Bek Air اۋە كومپانياسىنىڭ "فوككەر-100" ۇشاعىنىڭ كومانديرى دميتريي رودين ءشاسسيى جوق ۇشاقتى قالاي قوندىرعانى جايلى ايتىپ بەرگەن بولاتىن. 

ەسكە سالا كەتەيىك، كەشە Bek Air اۋە كومپانياسىنىڭ قىزىلوردادان ۇشىپ كەلگەن ۇشاعى استانا اۋەجايىندا اپاتتى جاعدايدا قونعان بولاتىن. ۇشاق الدىڭعى ءشاسسيسىز قونعان. وقيعا ساعات 10.30-دا بولدى. ايتا كەتەيىك، اپاتتى جاعدايعا بايلانىستى اۋەجاي جۇمىسىن ساعات 13.00-گە دەيىن توقتاتتى. سونىمەن قاتار، كوماندير مەن ەكىنشى پيلوت ۇكىمەتتىك سىيلىققا ۇسىنىلماق.