ەكى اپتا بۇرىن Bek Air كومپانياسىنا تيەسىلى تاعى ءبىر ۇشاقتىڭ شاسسيىندە اقاۋ بولعانى انىقتالىپ وتىر، - دەپ حابارلايدى «قامشى» پورتالى kaz.tengrinews.kz -كە سىلتەمە جاساپ.

27 ناۋرىزدا Bek Air كومپانياسىنىڭ قىزىلوردادان ۇشقان ۇشاعى استانا اۋەجايىنا الدىڭعى ءشاسسيسىز اپاتتى جاعدايدا قونعاننان كەيىن الەۋمەتتىك جەلى قولدانۋشىلارى وسىعان ۇقساس وقيعانىڭ بۇدان بۇرىن دا بولعانىن ايتۋدا.

مىسالى، الەۋمەتتىك جەلى قولدانۋشىلارى ەكى اپتا بۇرىن اقتوبە-استانا باعىتىنداعى ۇشاقتىڭ شاسسيىندە دە اقاۋدىڭ بولعانىن ايتتى. بۇل اقپاراتتى Bek Air كومپانياسىنىڭ باسشىسى نۇرلان جۇماسۇلتانوۆ راستاعان. ونىڭ ايتۋىنشا، سول كەزدە شاسسي شىققانىمەن، كابيناداعى شام جانباي قالعان.

"ءبىز بۇل ماسەلەنى شەشتىك. 27 ناۋرىزدا استانا اۋەجايىنا اپاتتى جاعدايدا قونعان ۇشاق باسقا بولاتىن. اقتوبە اۋەجايىنىڭ ۇشۋ جولاعىندا قار مەن سۋ ارالاسقان شالشىق جاتقان. ۇشاق جولاقپەن جۇرگەن كەزدە شالشىق شاسسيگە دە، كابيناداعى شامدى جاعۋعا ارنالعان تەتىككە دە تيەدى. ۇشاق اۋەگە كوتەرىلگەن كەزدە وندا مۇز قاتىپ قالعان ەكەن. شاسسي ءتۇستى، دەگەنمەن سيگنال بەرۋ جۇيەسى ىسكە قوسىلمادى. ۇشاق جەرگە ءساتتى قوندى. مۇز ەرىگەننەن كەيىن شام جاندى"، - دەدى ول. كومپانيا باسشىسىنىڭ ايتۋىنشا، ۇشاق قونار الدىندا 30 مينۋت بويى اينالىم جاساعان.

بۇعان دەيىن ازاماتتىق اۆياسيا كوميتەتى "فوككەر-100" اۋە كەمەلەرىن تەحنيكالىق اكتسىز پايدالانۋعا تىيىم سالعان بولاتىن. دەگەنمەن جۇماسۇلتانوۆتىڭ ايتۋىنشا، Fokker-100 ءتيپتى ۇشاقتار ءازىر ۇشىپ ءجۇر. "ازاماتتىق اۆياسيا كوميتەتى ءشاسسيدى جىيۋ جانە شىعارۋ جۇيەسىن ءبىر جولعى تەحنيكالىق تەكسەرىستەن وتكىزۋ جونىندە نۇسقاۋ جولدادى. ءبىز بۇل جۇمىستى ورىندادىق، ءقازىر ەشقانداي ماسەلە جوق. ۇشاقتار تەحنيكالىق تەكسەرىستەن وتكىزىلدى، كەشەدەن بەرى ۇشاقتار قايتادان اۋەگە كوتەرىلە باستادى. ۇشۋعا ەشكىم تىيىم سالمايدى. ازاماتتىق اۆياسيانىڭ وسىنداي شارا قولدانۋى ورىندى"، - دەدى ول.