بۇگىن ەلباسى نۇرسۇلتان نازاربايەۆ ۇلتتىق بانك باسشىسى دانيار اقىشيەۆتى قابىلدادى، - دەپ حابارلايدى «قامشى» پورتالى اقوردا سايتىنا سىلتەمە جاساپ.

كەزدەسۋ بارىسىندا د.اقىشيەۆ مەملەكەت باسشىسىنا ۇلتتىق بانكتىڭ قازىرگى قىزمەتى، سونداي-اق ەلدىڭ قارجى نارىعىنداعى احۋال تۋرالى باياندادى.

قازاقستان پرەزيدەنتى قاراجاتتى قازىرگى ۋاقىتتا ۇلتتىق ۆاليۋتامەن ساقتاۋ حالىق ءۇشىن ءتيىمدى ەكەنىن ايتتى.

– تەڭگە بويىنشا پايىزدىق مولشەرلەمە جوعارى، ال شەتەل ۆاليۋتاسىنداعى سالىمداردا ول الدەقايدا تومەن. ەلىمىزدەگى بارلىق ساتىپ الۋ، ساتۋ وپەراسيالارى جانە ەڭبەكاقى تولەمدەرى ۇلتتىق ۆاليۋتامەن جۇزەگە اسىرىلادى. نەگىزگى تاۋارلاردىڭ باعاسى تۇراقتى. سوندىقتان قاراجاتتى تەڭگەمەن ساقتاۋ بارلىق جاعىنان ءتيىمدى. حالىقتىڭ ۇلتتىق ۆاليۋتاعا كوبىرەك دەن قويعانى ماڭىزدى، – دەدى نۇرسۇلتان نازاربايەۆ.

د.اقىشيەۆ ناۋرىز ايىندا ۆاليۋتا نارىعىنداعى احۋال تۇراقتالعانىن اتاپ ءوتتى.

– مۇناي باعاسى، ساۋدا سەرىكتەستەرىمىز بولىپ سانالاتىن ەلدەردەگى ۆاليۋتا باعامى سياقتى پارمەندى سىرتقى ىقپالدار تۇراقتالدى. وسىنداي جاعدايدا بيىلعى اقپان ايىنان بەرى تەڭگە نىعايا باستادى، بۇل ۇدەرىس وسى ايدا جالعاستى. ءبىز ۇلتتىق ۆاليۋتا باعامىنداعى اۋىتقۋ ايتارلىقتاي تومەندەگەنىن جانە ونىڭ 1،6%-عا نىعايعانىن بايقاپ وتىرمىز، – دەيدى ۇلتتىق بانك ءتوراعاسى.

سونىمەن قاتار د.اقىشيەۆ سالىمداردى دوللارسىزداندىرۋ ءۇردىسى باستالعانىن ايتتى.

– ەل تۇرعىندارى مەن كاسىپورىندار ۇلتتىق ۆاليۋتاداعى سالىمدارىن بىرتىندەپ كوبەيتە باستادى. وسى ايدا بۇل ءۇردىس كۇرت جەدەلدەدى، – دەدى ۇلتتىق بانك ءتوراعاسى.

مەملەكەت باسشىسى كەزدەسۋ قورىتىندىسى بويىنشا ءبىرقاتار ناقتى تاپسىرما بەردى. 

مۇناي باعاسىنىڭ ازداپ بولسا دا وسۋىنە بايلانىستى ەلىمىزدىڭ قارجى نارىعىندا ۇلتتىق ۆاليۋتا باعامىنىڭ نىعايۋى بايقالادى. 25 ناۋرىز كۇنى وتكەن اپتانىڭ سوڭعى قارجى ساۋداسىندا دوللار باعامى 343،9 تەڭگەنى قۇراعان ەدى. ال، قازاقستان قور بيرجاسىنداعى بۇگىنگى ساۋدا ناتيجەسىندە اقش دوللارىنىڭ ورتاشا باعامى 340،15 تەڭگەنى قۇرادى.

بۇعان دەيىن «اسىل-ينۆەست» كومپانياسىنىڭ تالداۋ دەپارتامەنتى باسشىسى ايۆار بايكەنوۆ تەڭگە باعامى بۇدان دا نىعايۋ مۇمكىندىكتەرىنە يە، تەك ۇلتتىق بانكتىڭ ۆاليۋتا نارىعىنا ارالاسۋى تەڭگە باعامىنىڭ وسۋىنە كەدەرگى كەلتىرىپ وتىر دەگەن مالىمدەمە جاساعان بولاتىن.

«ۇلتتىق بانك ارەكەتتەرى تۇسىنىكسىز بولىپ وتىر. بىلاي قاراساق، بىلتىر قازاقستان ەركىن ۆاليۋتا نارىعىنا كوشتى. ال، ءىس جۇزىندە ەركى اينالىم تەك تەڭگەنىڭ قۇلدىراۋ باعىتىندا عانا ءجۇرىپ وتىر. ال، تەڭگە نىعايا باستاسا ۇلتتىق بانك ارالاسىپ، ونى تەجەيدى. بۇل مەنىڭشە، ۇكىمەت تاراپىنان جاسالعان قىسىم سالدارىنان بولىپ وتىرعان سياقتى. ويتكەنى، 2016 جىلعا ارنالعان بيۋدجەتتە دوللار باعامى 300 ەمەس، 360 تەڭگە بولادى دەپ جوسپارلانعان. ماكروەكونوميكالىق كورسەتكىشتەردىڭ وڭالۋىنا بايلانىستى ۇكىمەت بيۋدجەتتى قايتا قاراۋعا قۇلىقسىز. تەڭگەنىڭ نىعايۋى كەرىسىنشە، جاعىمسىز سەناريي رەتىندە قاراستىرىلۋدا»، - دەگەن پىكىردە ا. بايكەنوۆ.

بىلتىرعى جىلى بەكىتىلگەن رەسپۋبليكالىق بيۋدجەتتە دوللار باعامى 300 تەڭگە كولەمىندە بولادى دەپ جوسپارلانىپ، جاڭا جىلدان سوڭ ۇكىمەت بۇل جوسپاردى قايتا قاراعان ەدى. ناتيجەسىندە اقپان ايىندا رەسپۋبليكالىق بيۋدجەتكە وزگەرىستەر مەن تولىقتىرۋلار ەنگىزىلىپ، وندا دوللاردىڭ ورتاشا باعامى 360 تەڭگە، مۇناي باررەلىنىڭ ورتاشا جىلدىق باعاسى 30 دوللار كولەمىندە بەلگىلەنگەن بولاتىن.

جومارت ابدوللا ۇلى