استانا اۋەجايىنا الدىڭعى دوڭگەلەكسىز ۇشاق قوندىرعان ۇشقىشتىڭ ەرلىگى كوركەم سۋرەتكە ارقاۋ بولدى، - دەپ حابارلايدى «قامشى» پورتالى.
سەمەيدەگى اسكەري وركەسترلەردىڭ بىرىندە كلارنەتيست بولىپ قىزمەت ەتەتىن مۇحتار ساپاروۆ بوس ۋاقىتىن قىلقالاممەن وتكىزەدى. مۇحتار سالاتىن كوركەمسۋرەتتەرىنە قوعامدا بولىپ جاتاتىن ەلەۋلى وقيعالار مەن وزەكتى تاقىرىپتاردى نەگىز ەتەدى. بۇعان دەيىن ول باعانىڭ قىمباتتاۋى، جىلۋ جۇيەسىندەگى ولقىلىقتار سىندى ماسەلەلەرگە قالام تەربەگەن ەكەن.
كەيدە مۇحتار اقپارات قۇرالدارىنان وقىعان جاڭالىقتارىن دا كوركەم سۋرەت ەتىپ، قاعازعا ءتۇسىرىپ جاتادى. كەشە استانا اۋەجايىنا اپاتتى جاعدايدا قونعان ۇشاق تا اۋەسقوي سۋرەتشىنى بەيجاي قالدىرماعان. مۇحتار دوڭگەلەگىندە اقاۋى بار ۇشاقتى اۋەجايعا ءدىن امان قوندىرعان ۇشقىشتاردىڭ شەبەر ارەكەتىن ەرلىككە باعالاعان. ءسويتىپ، الدىڭعى دوڭگەلەكسىز اۋەجايعا قونعان ۇشاق سۋرەتىن ءتۇرلى-تۇستى قارىنداش، فلوماستەر جانە قالام كومەگىمەن كوركەم سۋرەتكە اينالدىرعان.
