اسا ءىرى كولەمدە قارجى جىمقىرعان اقپاراتتاندىرۋ جانە بايلانىس كوميتەتى، «قازاقتەلەكوم»، «قازتاگ» جشس-نىڭ لاۋازىمدى تۇلعالارىنا قاتىستى قىلمىستىق ىستەردى تەرگەۋ جالعاسۋدا، - دەپ حابارلايدى «قامشى» پورتالى 24kz-كە سىلتەمە جاساپ.
2010-2015 جج. اقپاراتتاندىرۋ جانە بايلانىس كوميتەتىنىڭ باسشىلارى قاليانبەكوۆ، قازانعاپ پەن بەرسىبايەۆ «قازتاگ» اگەنتتىگىنىڭ باسشىسى ماتايەۆ اسەتپەن 5 شارت جاساسقان.
بۇل تۇلعالار مەملەكەتتىك ساتىپ الۋ تۋرالى زاڭدى ورەسكەل بۇزىپ، تەك «قازتاگ» اگەنتتىگىمەن شارتقا وتىرۋ جاعدايىن قاساقانا تۋدىرىپ، وزگە باسەكەلەستەردى شەتتەتكەن.
سوتقا دەيىنگى تەرگەۋ بارىسىندا «قازتاگ» اگەنتتىگىنىڭ باس ديرەكتورى اسەت ماتايەۆ بيۋدجەت قارجىسىن جىمقىرۋعا تىكەلەي قاتىسقاندىعى انىقتالدى.
اسەت ماتايەۆ جالعان اكتىلەرگە ءوزى قول قويىپ، اقشانى «ۇلتتىق باسپا ءسوز كلۋبى» بولىمشەسىنىڭ ەسەپ-شوتىنا اۋدارىپ وتىرعان.
ءقازىر سوت بەرسىبايەۆ، ارپابايەۆ پەن اسەت ماتايەۆقا قاتىستى «ءۇي قاماقتا ۇستاۋ» تۋرالى بۇلتارتپاۋ شاراسىن قولداندى.
ال كوميتەتتىڭ قازىرگى ءتوراعاسى قازانعاپ پەن ەكس-توراعا قاليانبەكوۆ «ەشقايدا كەتپەۋ تۋرالى» ءتىلحات جازىپ بەردى، دەپ حابارلايدى جەمقورلىققا قارسى كۇرەس جونىنەن ۇلتتىق بيۋرو.
