ورال قالاسىنداعى سۇلۋلىق سالونىندا ماسكەۋلىك كوسمەتولوگ-دارىگەر ەلۆيرا يۋسۋپوۆا سالعان ەكپەدەن كوز جۇمعان كەلىنشەك باتىس قازاقستان وبلىستىق مەملەكەتتىك كىرىستەر دەپارتامەنتى باسشىسىنىڭ ايەلى، ال، سۇلۋلىق سالونىنىڭ يەسى وسى مەكەمە باسشىسى ورىنباسارىنىڭ زايىبى بولىپ شىقتى، - دەپ حابارلايدى «قامشى» پورتالى وڭىرلىك باق-تارعا سىلتەمە جاساپ.

NewTimes.kz باسىلىمىنىڭ جازۋىنشا، «شىعىس جۇلدىزى» ءسان سالونىنىڭ يەسى – وبلىستىق مەملەكەتتىك كىرىستەر دەپارتامەنتى باسشىسىنىڭ ورىنباسارى باۋىرجان قايداروۆتىڭ ايەلى بولسا، سالون قىزمەتىن پايدالانامىن دەپ كوز جۇمعان 39 جاستاعى كەلىنشەك باۋىرجان قايداروۆتىڭ باستىعى امانجول جاقانوۆتىڭ جۇبايى كورىنەدى.  

سالون يەسى ۆەنەرا قايداروۆا.

ماسكەۋلىك كوسمەتولوگ ەلۆيرا يۋسۋپوۆا.

سۇلۋلىق سالونىنداعىلار كىسى ولىمىنە سەبەپ بولعان ەكپەنى ماسكەۋدەن كەلگەن كوسمەتولوگ-دارىگەر ەلۆيرا يۋسۋپوۆا سالعانىن حابارلاعان.

«ماسكەۋلىك دارىگەر ينەكسيا جاسادى. سالماس بۇرىن الدىمەن، اللەرگياعا اسەرى تەكسەرىلدى. ەشقانداي اللەرگيا بولمادى. ءبىراق، ەكپە سالعان سوڭ كەلىنشەك قۇرىسىپ قالدى، اۋزىنان كوبىك اتقىلادى. ءبىز بىردەن جەدەل جاردەم شاقىردىق. ءبىزدىڭ سالوندا جالپى مۇنداي ەكپەلەر جاسالمايدى»، - دەگەن سالون اكىمشىسى.

وسى ورايدا، ءوڭىر تۇرعىندارى وتكەن اپتادا اتالعان سالوندا 26-28 ناۋرىز ارالىعىندا ماسكەۋلىك كوسمەتولوگ ەلۆيرا يۋسۋپوۆا قابىلداۋ جۇرگىزەتىنى تۋرالى WhatsApp مەسسەندجەرى ارقىلى حابارلامالار العانىن ايتۋدا. وندا كوسمەتولوگتىڭ قانداي قىزمەت تۇرلەرىن كورسەتەتىنى تاپتىشتەپ جازىلىپ، كەرى بايلانىس ءۇشىن تەلەفون ءنومىرى كورسەتىلگەن. ول ءنومىر سالون يەسىنىڭ تەلەفونى ەكەنى كەيىن انىقتالىپ وتىر. سالون قىزمەتكەرلەرى اتالعان حابارلامانى باسشىلارىنىڭ بىر-ەكى قۇربىسىنا جولداعانىن، ماسكەۋلىك دارىگەردىڭ دە وسى سالون يەسىنە قوناققا كەلگەنىن راستاپ وتىر.

ەستەرىڭىزگە سالساق، كەشە ساعات 12.25 شاماسىندا ورالداعى «شىعىس جۇلدىزى» سۇلۋلىق سالونىندا 39 جاستاعى كەلىنشەككە ەكپە جاسالىپ، ەكپە ناتيجەسىندە كەلىنشەك سول جەردە جەدەل جاردەم جەتكەنشە كوز جۇمعان بولاتىن. وبلىستىق دەنساۋلىق ساقتاۋ باسقارماسىنداعىلار جەدەل جاردەمنىڭ شاقىرىلعان مەكەن-جايعا بەس مينۋت ىشىندە جەتكەنىن، دارىگەرلەر بارعاندا ەكپە سالىنعان كەلىنشەكتىڭ قايتىس بولعانىن ايتىپ وتىر.

اقپارات قۇرالدارى قايتىس بولعان كەلىنشەكتىڭ ارتىندا ءۇش بالاسى قالعانىن ايتۋدا.

ءقازىر ەلۆيرا يۋسۋپوۆا ۇستالىپ، قۇقىققورعاۋ ورگاندارىنا تۇسىنىك بەرۋدە.