ۇلتارالىق ارازدىق تۋعىزدى دەپ ايىپتالعان قوعام بەلسەندىلەرى ەرمەك نارىمبايەۆ پەن سەرىكجان مامبەتالينگە قاتىستى بۇگىن اقىرعى سوت شەشىمى شىقتى، - دەپ حابارلايدى «قامشى» پورتالى.

بۇعان دەيىن المالى اۋداندىق سوتى ەرمەك نارىمبايەۆقا ءۇش جىل، سەرىكجان مامبەتالينگە ەكى جىل باس بوستاندىعىن ايىرۋ جازاسىن كەسكەن بولاتىن.

ءىستى قاراعان قالالىق سوت ايىپتالۋشىلارعا كەسىلگەن جازانى جۇمسارتىپ، باس بوستاندىعىنان ايىرۋمەن بايلانىستى ەمەس جازا تاعايىندادى. سوت ۇكىمىمەن ە. نارىمبايەۆقا ءۇش جىل، س.مامبەتالينگە ءبىر جىل باس بوستاندىعىن شەكتەۋ جازاسى بەلگىلەندى. تەرگەۋ كەزىندە قاماۋدا بولعان ۋاقىتتارىن ەسكەرىپ، سوت ەرمەكتىڭ 2 جىل 7 كۇن، سەرىكجاننىڭ 8 اي 12 كۇن باس بوستاندىعى شەكتەلەتىنىن حابارلادى.

ەستەرىڭىزگە سالساق، ەرمەك نارىمبايەۆ پەن سەرىكجان مامبەتالين فەيسبۋك الەۋمەتتىك جەلىسىندە مۇرات تەلىبەكوۆ دەگەن ازاماتتىڭ كىتابىنان ءۇزىندى جاريالاپ، ۇلتارالىق الاۋىزدىق تۋعىزدى دەپ ايىپتالعان بولاتىن.