جامبىل وبلىستىق «اقىل-ەسى كەم بالالارعا ارنالعان ينتەرنات ۇيىندە» تاراز مەملەكەتتىك پەداگوگيكالىق ينستيتۋتىنىڭ ۇيىمداستىرۋىمەن «بالالارعا قۋانىش سىيلايىق!» اتتى قايىرىمدىلىق اكسياسى ءوتتى، - دەپ حابارلايدى «قامشى» پورتالى وقۋ ورنىنىڭ باسپا ءسوز قىزمەتىنە سىلتەمە جاساپ.
"ءىس-شارانىڭ ماقساتى – جاس ۇرپاقتىڭ ساناسىنا مەيىرىمدىلىك، سۇيىسپەنشىلىك، قايىرىمدىلىق ۇعىمدارىن قالىپتاستىرۋ. سونداي-اق الەۋمەتتىك جاعدايى تومەن بالالارعا كومەك كورسەتۋ، جاسوسپىرىمدەردى كىشىپەيىلدىلىككە، باۋىرمالدىققا باۋلۋ، بالالارعا از دا بولسا قۋانىش سىيلاۋ" دەلىنگەن باسپا ءسوز قىزمەتى تاراتقان حابارلامادا.
ۇلىستىڭ ۇلى كۇنى – ءاز-ناۋرىز مەرەكەسى قارساڭىندا وتكەن اكسيا بارىسىندا ينستيتۋت قىزمەتكەرلەرى «ۇلىق مەرەكە» اتتى تەاترلاندىرىلعان قويىلىم كورسەتىپ، وقۋشىلاردىڭ ويلاۋ قابىلەتىن ارتتىرۋعا سەپتەسەتىن ءتۇرلى ويىندار وتكىزدى. سونىمەن قاتار جارىمجان جەتكىنشەكتەرمەن جۇمىستا جاڭا ءادىس تابۋعا شەشىم قابىلداپ، مەكتەپ ينتەرناتتا ەمدەلىپ جاتقان بالالاردىڭ ساۋىعۋ پروسەسىندە ونەردى كەڭىنەن قولداناتىن زاماناۋي ءادىستى پايدالاندى.
«بالالارعا قۋانىش سىيلايىق!» قايىرىمدىلىق اكسياسى قوعامداعى قايىرىمدىلىق يدەيالارىنا قولداۋ كورسەتۋگە باعىتتالعان.
– الەۋمەتتىك ادىلدىك، تەڭدىك، ءوزارا سىيلاستىق پەن قامقورلىق تۋرالى نيەتتى تەك قانا مەملەكەت ەمەس، ازاماتتىق ورتانىڭ ءوزىنىڭ كوتەرۋى – قوعامىمىزدىڭ كەمەلدەنگەنىن كورسەتەدى. قايىرىمدىلىق – قازاق حالقىنىڭ ەڭ ىزگى دە اسىل قاسيەتتەرىنىڭ ءبىرى. كەمتار، جەتىم، قامقورلىققا الىنعان بالالارعا ايالى الاقانىن توسىپ، جۇرەك جىلۋىن ۇسىنۋ، ساۋابى مول ىسكە اتسالىسۋ ءاربىر ادامنىڭ ازاماتتىق پارىزى، – دەيدى اكسيانى ۇيىمداستىرۋشىلار.
پەداگوگيكالىق ينستيتۋتتىڭ پروفەسسور-وقىتۋشىلارى مەن ستۋدەنتتەرى الداعى ۋاقىتتا وسى تاقىلەتتەس شارالاردى تۇراقتى تۇردە وتكىزۋدى جوسپارلاپ وتىر.
