كەشە قازاقستاندىق ءبىرقاتار اقپارات قۇرالدارى 2012 جىلى اتىشۋلى «ارقانكەرگەن» وقيعاسى بويىنشا باستى قىلمىسكەر ۆلاديسلاۆ چەلاحتىڭ اتا-اناسى مەن باسقا دا وتباسى مۇشەلەرى ۇيلەرىن ساتىپ، قازاقستاننان كوشكەلى جاتقانىن حابارلادى.

باق-تىڭ حابارلاۋىنشا چەلاحتىڭ وتباسى كوشۋگە ساقاداي-ساي وتىرعان كورىنەدى. رەسەيدىڭ وتانداستار باعدارلاماسى بويىنشا كوشى-قون قۇجاتتارى دا دايىن كورىنەدى. تەك قاراعاندىداعى ۇيلەرىن ساتىپ، اقشاسىن قالتاعا باسۋ عانا قالعان. اقپارات قۇرالدارى دا چەلاح وتباسىنىڭ كوشكەلى جاتقانىن ونىڭ شەكاراشىنىڭ اتا-اناسى تۇراتىن ءۇيدىڭ ساتىلاتىنى تۋرالى قۇلاقتاندىرۋدان بىلگەن.

ال، ۆلاديسلاۆتىڭ اناسى سۆەتلانا ۆاششەنكو ەلدەن كوشۋىنە مۇنداعى زاڭنىڭ ادىلەتسىزدىگى، سونىڭ سالدارىنان ۇلىنىڭ سوتتالۋى سەبەپ بولدى دەپ وتىر.

«مەن بۇل ەلدە ەندى تۇرعىم كەلمەيدى. ۇلىمدى ادىلەتسىز سوتتاپ جىبەردى. ءبىزدىڭ دوستارىمىزدىڭ بارلىعى انا جاققا كوشىپ كەتتى باياعىدا. ولار ۇكىم شىققان سوڭ كوشە باستادى. وعان دەيىن كوشۋ تۋرالى وي ەشكىمدە بولماعان. وزدەرىنىڭ بالالارى دا وسىنداي جاعدايعا تاپ بولۋىنان قورىقتى»، - دەگەن سۆەتلانا ۆاششەنكو.

الايدا، ەلدەن كەتكەنمەن ۇلىنا كەلىپ تۇراتىندارىن، وعان مۇمكىندىكتەرى بارىن ايتقان.

«ءبىز ۆلادقا بۇرىنعىداي كەزدەسۋگە بارىپ تۇرامىز. بىزگە جىلىنا ءتورت رەت كەزدەسۋگە رۇقسات بەرەدى. سوڭعى رەت جەلتوقسان ايىندا باردىم. اجەسى دە جاقىندا بارىپ كەلدى. بىزگە ونى تۇرمەدە كورۋ اۋىرعا سوعادى»، - دەگەن س. ۆاششەنكو تۇزەۋ مەكەمەسىندەگى ۇلىمەن جولىعۋدا قانداي دا ءبىر كەدەرگىلەردىڭ جوقتىعىن العا تارتادى.

ونىڭ ايتۋىنشا، ءقازىر چەلاح وتباسىن قازاقستاندا ۇستاپ تۇرعان ءبىر عانا سەبەپ – 30-35 مىڭ اقش دوللارىنا باعالاپ وتىرعان پاتەرلەرىن ساتۋ ماسەلەسى.

ال، وسى تاقىرىپتا الەۋمەتتىك جەلىلەر مەن اقپارات قۇرالدارىنداعى جاريالانىمداردا پىكىر بىلدىرۋشىلەردىڭ ويلارى ءبىر جەردەن شىقپاي وتىر.

جەلى قولدانۋشىلاردىڭ ءبىرى ۆ. چەلاحتىڭ ءىستى بولۋىنا تۇتاستاي مەملەكەتتىك جۇيەنى ايىپتاپ، جوعارى باسشىلىقتا وتىرعاندار كىنالى دەسە، ءبىرى ەلدى تاستاپ، رەسەيگە كوشكەلى جاتقان شەكاراشىنىڭ وتباسىنىڭ ارەكەتىن تەرىس كورەدى. ءتىپتى، پىكىر بىلدىرۋشىلەردىڭ ىشىندە «چەلاح بالكىم تۇرمەدە ەمەس، ەلدەن جاسىرىن شىعارىلىپ جىبەرىلگەن شىعار. مىنالار سونىڭ ارتىنان كوشكەلى وتىرعان بولار» دەيتىندەر دە تابىلعان.

ەستەرىڭىزگە سالساق، قازاق-قىتاي شەكاراسىنداعى «ارقانكەرگەن» شەكارا بەكەتىندە 2012 جىلعى 27 مامىردا 14 شەكاراشى مەن شەكارا بەكەتى ورنالاسقان جەردەگى ورمانشىنى اتىپ تاستادى، قىزمەت ورنىن تاستاپ كەتتى، اسكەري مۇلىكتى ءبۇلدىردى دەگەن بىرنەشە ايىپ تاعىلعان شەكارا قىزمەتىنىڭ مەرزىمدى قىزمەتتەگى ساربازى ۆلاديسلاۆ چەلاح سول جىلى 11 جەلتوقساندا اسكەري سوت ۇكىمىمەن ءومىر بويى باس بوستاندىعىنان ايىرۋ جازاسىنا كەسىلگەن بولاتىن. سول كەزدە اقپارات قۇرالدارى ول جازاسىن ەل اراسىندا «قارا بۇركىت» اتالىپ كەتكەن قوستاناي وبلىسىنداعى ەرەكشە رەجيمدەگى 161/3 تۇزەۋ مەكەمەسىندە وتەيدى دەپ حابارلادى.