سولتۇستىك قازاقستان وبلىسىنداعى ءبىرقاتار جول بولىگىن دە سۋ باسۋ ءقاۋپى بار، - دەپ حابارلايدى «قامشى» پورتالى 24.kz-كە سىلتەما جاساپ..

مۇنداي ۋچاسكەلەردىڭ سانى وڭىردە 179-عا جەتكەن. ءقازىردىڭ وزىندە تايىنشا، ەسىل جانە ايىرتاۋ اۋداندارىندا سۋ تاس جولداردىڭ ۇستىنەن اعىپ جاتىر. ال كىشكەنەكول-قاراتەرەك باعىتىنداعى كۇرە جولدى ەرىگەن قار سۋى شايىپ كەتكەن.

بەيبىت يسمانوۆ، وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى:

- سۋ وسى ماڭداعى بوگەتتى تولىعىمەن شايىپ كەتتى. سالدارىنان ءتورت مەتر اۆتوموبيل جولىنا زالال كەلتىرىلدى. ءقازىر بۇل اۋماققا ەسكەرتۋ بەلگىلەرى قويىلىپ، قورشاۋعا الىندى. ال تۇرعىندار بولسا، اينالما جولمەن قاتىناپ جاتىر.

ەستەرڭىزگە سالساق، بيىل وبلىستا 360 شاقىرىم جول جوندەلەدى. بۇل ماقساتقا 6 ملرد تەڭگەگە جۋىق قارجى قاراستىرىلعان. سونداي-اق «نۇرلى جول» باعدارلاماسى بويىنشا جۇزەگە اسىپ جاتقان «استانا – پەتروپاۆل» تاس جولى دا بيىل حالىقتىڭ يگىلىگىنە بەرىلەدى دەگەن جوسپار بار.