ەلىمىزدىڭ ءبىلىم جانە عىلىم ءمينيسترى ەرلان ساعادييەۆتىڭ «ەلەكتروندى ۇكىمەتتەگى» بلوگىندا وسىنداي حابارلاما جاريالاندى، - دەپ حابارلايدى «قامشى» پورتالى.
بۇرىنىراق حابارلانعانداي ەلىمىزدە ءبىرىڭعاي مەكتەپ فورماسىن ەنگىزۋ ماسەلەسى شەشىلگەن بولاتىن. بۇدان بىلاي وقۋشىلاردىڭ مەكتەپ قابىرعاسىندا الا-قۇلا كيىنۋىنە تىيىم سالىنىپ، ءبىلىم مەكەمەلەرىنە اتا-انالاردىڭ ۇجىمدىق كەڭەستەرى ارقىلى ءبىر تەكتى كيىم ۇلگىسىنە كوشۋ مىندەتتەلدى.
الايدا، ءبىرقاتار قوعام مۇشەلەرى بۇل باستاما ازاماتتاردىڭ ءدىني نانىم-سەنىم بوستاندىقتارىنا قايشى كەلىپ، ازاماتتاردىڭ قۇقىقتارىن شەكتەيدى دەپ نارازىلىق تۋعىزعان بولاتىن.
قىز بالالاردىڭ مەكتەپكە ورامال تاعىپ بارۋىنا رۇقسات سۇراپ مينيسترلىككە ءوتىنىش جولداعانداردا دا ەسەپ جوق كورىنەدى.
«ورامال مەن كيمەشەك كونستيتۋسيالىق تالاپتاردىڭ ەشقايسىسىنا قايشى كەلمەيدى. دەمەك، ونى تاعۋدى شەكتەۋ – زاڭسىز. «بالا قۇقىعى تۋرالى» زاڭ دا، كونستيتۋسيا باپتارى دا مۇنداي شەكتەۋ قويمايدى. سوندىقتان وسى ماسەلەنىڭ وڭ شەشىمىن تاپقانىن قالايمىز»، - دەگەن ءوتىنىش يەلەرىنىڭ ءبىرى يمان قۋانىش قىزى.
ءوز كەزەگىندە ءبىلىم جانە عىلىم مينيسترلىگىندەگىلەر ءبىرىڭعاي مەكتەپ فورماسىن ەنگىزۋ وزىق ءبىلىم ۇيىمدارىنىڭ تاجىريبەسىنە سۇيەنىپ جاسالعانىن حابارلادى.
«قابىلدانعان تالاپتارعا سايكەس، مەكتەپ فورماسىن ەنگىزۋ جالپى مەكتەپتىك اتا-انالار جينالىسىنىڭ شەشىمىمەن جۇزەگە اسادى. تالاپقا سايكەس، مەكتەپ فورماسىنىڭ فاسونى مەن ءتۇسىن ءبىلىم بەرۋ مەكەمەسى مەن اتا-نالار قاۋىمىنىڭ بىرلەسىپ تاڭدايدى. ءبىلىم بەرۋ مەكەمەسى اتا-انالاردىڭ ۇسىنىسى بولعان جاعدايدا مەكتەپ فورماسىنا باس كيىم قوسۋ تۋرالى شەشىم شىعارا الادى»، - دەلىنگەن مينيستر بلوگىنداعى جاۋاپتا.
